Tshilumbu tshia Bantemu ba Yehowa tshiakoshibu

KUNYIMA kua diladikija misangu ne misangu, Kabadi kanene ka ku Tesalonike, mu Grèce, kakasangila ndekelu wa bionso mu dia 8 Kabalashipu 1995, bua kuteleja tshilumbu tshia Bantemu ba Yehowa bakaji banayi. Tshivuabu babafundile ntshinyi? Diandamuija ditabuja dia bakuabu, didi mikenji ya mu Grèce mikandike kukadi bidimu bipite pa makumi atanu.

Kadi, pakadisangisha bena mu kabadi, ntemu wa kumpala mufundianganyi​—nsaserdose uvua mujudishe tshilumbu ne bakaji banayi aba—​katshivua kabidi ne muoyo. Nsaserdose mukuabu wakateta bua kufila bujadiki pa muaba wende, kadi bena mu kabadi bakabenga bulumbuludi buende. Nunku’eu, kabiena bikemesha muvua diteleja dinenga amu minute 15! Nzuji wakela bantemu bakuabu bafundianganyi nkonko ne kumona se: bavuabu bafunda kabavua bapie tshibawu tshia diandamuija ditabuja dia bakuabu dikena dilonda mikenji. Nkosedi eu wa bilumbu udi uleja ne: tubadi tua mu Grèce tudi tujinga kunemeka ne kulamata ku dipangadika dipatula mu 1993 kudi Kabadi ka ku Mputu ka Manême a Muntu.

Biakakemesha nangananga pa kumona bakaji basatu bavua bujadike bumonyi baya kudi Bantemu bavuabu bafunda, bua kubela ka-lumbandi ne muoyo mujima. “Tudi tunulomba luse bua bionso bidi bipite ebi,” ke muakamba umue wa kudibu. Wakasakidila ne: “Kabivua tshilema tshietu nansha. Nsaserdose ng’uvua mutuenzeje ku bukole bua tuetu kujadika bumonyi. Mpindieu bu mukadiye mufue, tudi basue bua nuenu kulua mu musoko wetu ne kumbelu yetu.”

Nunku’eu, Yehowa mmupeteshe kabidi bantu bende ditshimuna dia dikema mu Grèce. Mikenji ya dikandika diandamuija ditabuja dia bakuabu yakedibua mu Grèce mu 1938 ne mu 1939. Mu 1993 Kabadi ka ku Mputu ka Manême a Muntu kakapatula dipangadika dia se: ditumika ne mikenji eyi bua kukengesha Bantemu ba Yehowa ki ndiakane.​—Tangila Tshibumba tshia Nsentedi, 1 Kabitende 1993, mabeji 27-31.