Bulelela bua Evanjeliyo

TUTUPA tukese tusatu tua maniskri wa Evanjeliyo wa Matayo, muinyika dîna dia P⁶⁴, ntulamibue ku université wa Magdalen ku Oxford, mu Angleterre, bituadijile ku 1901. Munkatshi mua tshikondo kampanda, bashikuluji bavua bitabuja ne: tuvua tua ku ndekelu wa siekele muibidi B.B.

Mu matuku adi panshi aa, Carsten P. Thiede, muntu mupiluke mu dilonga dia nyandu (papyrus) ku Paderborn, mu Allemagne, wakalombola dikonkonona diondoke dia P⁶⁴, údí muenza ne bitupa bia mvese 10 ya Matayo nshapita wa 26. Tshipeta? Pa kufunda mu Zeitschrift für Papyrologie und Epigraphik (Tshikandakanda tshia dilonga dia nyandu ne mifundu ya kale), Thiede udi umvuija tutupa tua maniskri tua ku Oxford bu “tshitupa tshia codex (maniskri misangisha) wa bena nkristo wa mu siekele wa kumpala, pamu’apa (nansha mudibi kabiyi ne bua kuikala anu nanku) wa mu matuku a kumpala kua 70 B.B.”

Mumvuija a Thiede akakebesha dikokangana dikole munkatshi mua bamuangalaji ba ngumu ne bisumbu bia bashikuluji. Bua tshinyi? Bualu tshìdì tshianyishibue matuku adi panshi aa bu tshitupa tshikulukulu tshidi tshishale tshia mifundu ya Evanjeliyo tshidi P⁵², tshitupa kampanda tshia Evanjeliyo wa Yone tshia bu mu 125 B.B., peshi katshiyi tshia kumpala kua siekele muibidi.

Tutshidi batangile né bungi bua bidimu buambibue ne: mbua bitupa bia nyandu wa P⁶⁴ nebuanyishibue kudi bantu bavule. Mu mushindu kayi wonso, bidimu bisemeja kumpala nebijadike ki ng’anu se: P⁶⁴ mbitupa bikulukulu bia Evanjeliyo bidiku; kadi neafile kabidi bujadiki bua pa mutu budi buleja ne: Evanjeliyo wa Matayo uvua bushuwa mufunda mu siekele wa kumpala, pamu’apa nansha kumpala kua 70 B.B., pavua bamonyi bavule ba mianda ya mu nsombelu wa Yezu batshikale ne muoyo bua kujadika bulelela bua Evanjeliyo.

[Mêyi a dianyisha bua tshimfuanyi mu dibeji 32]

Ku dianyisha dia mulombodi ne ba-profesere ba université wa Magdalen College, Oxford.