Bamanyishi ba Bukalenge badi balonda

Baluishi ba kale mu buobumue pa kusadila Yehowa

“MUSANGU wa kumpala ungakumvua bualu kampanda pa Bantemu ba Yehowa mpamvua nsadila bu mulami mu tshiluilu ku Bosnie,” ke mudi Branko umvuija.a

Branko uvua mu mudimu wa bulami mumuomekela ku lupitadi kampanda kuvua batapike ba ku mvita buondapibua. Umue wa ku ba-minganga uvua ulonga Bible ne Bantemu, ne munkatshi mua mudimu wa bulami butuku, wakumvuija Branko malu mavule pa bivuaye mulonge pa Bible.

Malu akumvua Branko butuku abu akalenga mutshima wende bikole ne kumusakawu diakamue ku ditula bingoma panshi. Wakamonangana ne Bantemu, ujinga kulonga bia bungi. Matuku makese pashishe, pakayaye mu ditunga dikuabu dia ku Mputu, Branko wakakeba Nzubu wa Bukalenge ne kutantshilaye tshisangilu kampanda tshia Bantemu ba Yehowa mu tshisumbu tshia muakulu wa tshiena-Yougoslavie. Ke kuvua Branko ne Slobodan bapetangane.

Slobodan uvua pende mufume ku Bosnie ne wakasadila bu mudisuile mu mvita imue imue eyi bu Branko​—kadi yeye uvua mu tshiluilu tshia luseke lukuabu. Slobodan uvua uluila bena Serbie bua kuluisha bena Croatie. Tshikondo tshiakapetanganabu, Slobodan ukavua Ntemu wa Yehowa mutambule. Wakalomba bua kulongaye Bible ne muluishi wende wa kale eu, Branko. Pavua dilonga dienda ditungunuka, Branko wakamanya bia bungi pa bidi bitangila Yehowa, ne dinanga diende kudi Nzambi diakavula. Ebi biakasaka Branko ku dilambula muoyo wende kudi Mufuki. Mu Kasuamansense 1993 wakaleja patoke tshimanyinu tshia diditshipa diende pa kutambula mu mâyi.

Mmushindu kayi wakalua Slobodan umue wa ku Bantemu ba Yehowa? Ukavua mumbuke mu muaba wa mvita ku Bosnie tshikondo kampanda kumpala. Uvua mubale ndambu wa mikanda ya Bantemu, kadi dijinga diende dia kumanya bia bungi pa Dîyi dia Nzambi kadiakakola too ne pakalua Bantemu babidi kuenza dikumbula kumbelu kuende mu 1992. Nnganyi wakakumbula Slobodan, wakamulomba bua kulonga nende Bible? Uvua Mujo, eu uvua mufume pende ku Bosnie kadi uvua mukolesha bu mizilma. Pavua dilonga dia Bible ditungunuka, Mujo ne Slobodan, bàvuà baluishi kumpala, bavua dituku dionso bapitshisha mêba popamue ne bakankamijangana mu ditabuja umue ne mukuabu.

Mvita ivua mienzeke mu Yougoslavie wa kale yakajimija mioyo ya nkama ya binunu bia bantu. Kadi Branko, Slobodan ne Mujo badi mpindieu basadila bu bamanyishi ba ku dîba ne ku dîba ba lumu luimpe mu tshisumbu tshimu’epele tshia Bantemu ba Yehowa. Mbatshimune dipanga kumvuangana didi pankatshi pa bisa ne dikoba, ne mpindieu badi bakeba ditalala pa kukokela Mufuki, Yehowa.

Kadi tshiakatuala mashintuluka aa ntshinyi? Tshivua dinanga diabu bua Yehowa, kanemu kabu bua Bible ne dizukila diabu bua kutumikila bulelela bua mu Bible mu nsombelu yabu. Anu mudi Mifundu Minsantu ileja, ‘Dîyi dia Nzambi didi ne muoyo ne bukole,  . . . ne didi mua kujingulula meji ne malu adi mutshima musue kuenza.’​—Ebelu 4:12.

[Mêyi adi kuinshi]