Butoke buenu bukenke!

NDEKELU wa bionso tshikondo tshiakalua bua mulume eu mununu kumona Masiya mulaya! Ku disokolola dia Nzambi Simeone uvua mumanye se: ‘kavua mua kumona lufu kayi muanji kumona Kristo wa [Yehowa, NW].’ (Lukase 2:26, MMM) Kadi ndupampu kayipu luvuaku pakabuela Simeone mu ntempelu ne pakateka Mariya ne Yozefe muana Yezu mu maboko ende! Wakatumbisha Nzambi, pa kuamba ne: “Mpindiewu, Mfumu wa bionso, lekela muntu webe aye mu bupole, . . . bualu mesu anyi mmamone lupandu luebe . . . mbutoke bua kutokesha nabu bukua bisamba ne lumu lua tshisa tshiebe tshia I[zal]ele.”​—Lukase 2:27-32, MMM; fuanyikija ne Yeshaya 42:1-6.

Yezu, kumbukila ku batismo wende pakavuaye ne bidimu 30 too ne ku lufu luende, wakajadika muvuaye “butoke” bua bukua-bantu. Mmu mishindu kayi? Wakakenkesha butoke bua mu nyuma pa kuyisha pa bidi bitangila Bukalenge bua Nzambi ne malongolola Ende. Wakela kabidi patoke malongesha a dishima pa malu a Nzambi ne kusokolola patoke midimu ya mîdima. (Matayo 15:3-9; Galatia 5:19-21) Nunku, Yezu uvua ne kabingila bua kuamba ne: “Ndi butoke bua bukua-bantu.”​—Yone 8:12, NW.

Yezu wakafua mu tshidimu tshia 33 B.B. Nunku butoke buakajimina anyi? Nansha kakese! Patshivuaye pa buloba, Yezu wakambila bayidi bende ne: “Butoke buenu bukenke kumpala kua bantu.” (Matayo 5:16, NW) Nanku, kunyima kua lufu lua Yezu balondi bende bakatungunuka ne kukenkesha butoke.

Pa kuidikija Yezu, lelu’eu bena nkristo badi baleja butoke bua Yehowa pa kuditua mu mudimu wa buambi. Badi ‘batungunuka ne kuenda bu bana ba butoke,’ pa kufila tshijadiki tshia mudibu bilejilu bidi bikenka mu nsombelu wa Buena-nkristo.​—Efeso 5:8, NW.