Bakoleshibue kudi Mulunda wabu mutambe bunene
BULUNDA bumue budi bukolesha Bantemu ba Yehowa mu mushindu wa pa buawu. Mmalanda abu a mushinga mukole ne Mulunda wabu mutambe bunene, Yehowa Nzambi. (Fuanyikija ne Yakobo 2:23.) Udi ubakuatshisha mu mateta makole a ditabuja.
Bantemu mbende lumu lua dilama muoyo mutoke muinshi mua mbulamatadi ya ba-tshikokesha-nkaya, lumu elu ndutumbishibue kudi bamonyi ba bungi. Umue wa kudibu udi Jiří Krupička, doktere mu filozofi ne mu dimanya dia bifukibua wakamuangala mu Tchécoslovaquie mu 1968 kunyima kua dipitshisha bidimu bivule mu tumponya tua disubishangana tua ba-Communiste. Mu mukanda wende wa Renesance rozumu (Diakajulula dia lungenyi), udi wela nseka pa dikengeshibua ne bushindame bua Bantemu bakedibua mu buloko bua ndubidilu wabu.
Muinshi mua mbulamatadi wa ba-Communiste, bakafundila Bantemu bavule buloko bualu bua ditabuja diabu. Nansha bedibue mu buloko, bavua babenga bua kumbula tubanda tua uranium bua bipatshila bia mvita. (Yeshaya 2:4) Krupička udi umvuija bualu kampanda buakamonaye ne mêsu ende ku tshimue tshia ku biina bia tubanda mu 1952. Wakamona mibidi ibidi mimane bu mpingu mibuikidija ne mâyi makuatakane mu mashika makole a muvu wa hiver. Ntuku ya biamu ivua mibuikidije mitu yabu ne bitumpampa.
Krupička udi ufunda ne: “Bavua bimane muaba au mu bilamba bisunsuke bia bena buloko kutuadija patshiatshia mu dinda. Mmunyi muvuabu mua kushala bimane mutantshi mule nunku ne mikolo mikuate mashika makole? Ku bukole bua ditabuja. Ntuku ivua ya kalekale ne mikuate dimoma. Muntu kampanda wa lukisu uvua ubatuta ne tshikisu pa mitu yabu ne pa makaya ne bukole buonso, e kufikishabi ntaku wa ntuku uvua kayi muimpe ku dipanda kazaku ne kutapa umue wa ku bantu aba mputa, ne mashi avua apueka kumbukila ku maboko ende a kazaku.
“Musalayi mulami wakimanyika mulongo wetu kumpala kuabu, ne mfumu wa basalayi kutuambilaye mêyi makese. Dibenga kutumika, ke muakambaye, didi buntomboji ne nanku didi ne bua kunyokibua. Miyuki idi mu lungenyi luabu ya mvita ne dishipa bantu kayakuambuluisha babengi aba ba diluangana mvita bua tuondo tua muoyo, baluishi aba ba socialisme.”
Mfumu wa basalayi eu wakambula mulonda wa tshiamu ne kukuma pa umue wa ku ntuku. Muntu uvuamu wakadishinda diakamue ne ntuku mubuikila ku mutu kuende. Tshiakenzeka pashishe ntshilamate bikole mu tshivulukilu tshia Krupička.
Udi wamba ne: “Kuvua kupatuka mêyi avua imba musambu munda mua ntuku. Mêyi matekete, dinungana dia disambila kudi Nzambi, eu udi mua kumvua bualu kayi buonso bufumine ku muaba kayi wonso—nansha musambu muimba pa kuenza madikolela munda mua ntuku ya kalekale ya uranium, mikale ne dimoma. Udi uteleja musambu wa mushindu’eu bikole kupita musambu muimba kudi tshisumbu tshia bimbi mu nzubu munene wa Nzambi.”
Mu dia 1 Kabitende 1993, mudimu wa Bantemu ba Yehowa mu République Tchèque wakapeta dianyishibua dia kudi mbulamatadi. Bantemu bena ditunga edi badi mpindieu basangala bua kutungunuja mudimu wabu wa Buena-nkristo wa dilongesha mu budikadidi. Eyowa, badi ne milowo bua kumanyisha bakuabu malu adi atangila Yehowa, Mulunda wabu mutambe bunene.
[Tshimfuanyi mu dibeji 7]
Babuedi ba mu mpuilu wa distrike mu République Tchèque