“Nudi nukengela ditantamena”

TUDI ‘tukengela ditantamena,’ bituasua kupeta “dikumbana dia dilaya.” (Ebelu 10:36, NW) Mushikuluji kampanda wa Bible udi umvuija ne: muaku wa tshiena-Greke bua “ditantamena” uvua mupostolo Paulo mutumike nau mu mvese eu uvua imue misangu wambuluisha bua kumvuija “bukokeshi bua tshikunyibua kampanda bua kuikala ne muoyo mu nsombelu mikole ne ikena miakanyine.”

Ku mikuna ya ku Mputu, kudi kukola tshikunyibua tshia mushindu’eu. Mu mushindu udi utamba kukoka ntema, tshidi tshibikidibua ne: “ikalaku-kashidi.” Tshikunyibua etshi tshia ku mikuna ya Alpes katshiena bushuwa ne muoyo bua kashidi, kadi tshidi tshitantamena munkatshi mua bidimu bivule, eku tshikuama bilongo bia mpatshi mu muvu wonso wa été. Tshibungu tshia The New Encyclopædia Britannica tshidi tshiumvuija ne: dîna ikalaku-kashidi divua dinyika tshikunyibua etshi bua “bukole ne dinenga” diatshi. (Mu sianse dîna dia bikunyibua ebi bia mu mulongo wa Sempervivum didi kabidi diumvuija “ikalaku-kashidi.”)

Tshidi tshienza tshikunyibua tshikole etshi tshia pa buatshi mmuditshi tshikola mu miaba ikena miakanyine nansha kakese. Tshidi mua kusanganyibua kuulu pa mpulumuku ya mikuna mikomba kudi lupepele, muaba udi luya mua kupueka ne degré 35 mu mêba 24 tshianana. Tshidi mua kuela miji mu mutanta kampanda wa dibue udi ne ndambu mukese wa buloba. Ng’imue nsapi kayi ya ditantamena diatshi mu nsombelu mikole nunku itudi mua kutela?

Tshikunyibua etshi tshia ikalaku-kashidi tshidi ne mabeji a mupimbu ne manene, adi alama bimpe mâyi. Ebi bidi bitshipetesha mushindu wa kubabidila menemene tshitalela tshia ku mvula anyi neje udi wenguluka. Kupita apu, tshidi tshikola mu tusumbu tudi tusangisha bukole buatu bua kushimata bikole pa nshindamenu watu wa dibue. Pa kuela miji mu mitanta, tshidi ne ndambu wa dikubibua ku lupepele ne mvula, nansha kuoku mua kuikala buloba bukese. Mu mêyi makuabu, tshidi tshikola bimpe pa kubabidila menemene nsombelu mikole.

Mu ngakuilu wa mu nyuma, tudi mua kusanganyibua mu nsombelu idi iteta ngikadilu wa ditantamena dietu. Ntshinyi tshiatuambuluisha bua kutantamena mu mateta? Anu bu tshikunyibua tshia ikalaku-kashidi, tudi mua kulama mâyi mapeteshi a muoyo a Dîyi dia Nzambi ne kushemesha malanda ne bena nkristo balelela bua kupeta nshindamenu ne dikubibua. Ku mutu kua bionso, anu bu tshikunyibua tshia ikalaku-kashidi, tudi ne bua kushala balamate bikole ku “dibue” dietu, Yehowa, ne ku Dîyi diende ne ku bulongolodi buende.​—2 Samuele 22:3.

Bushuwa, tshikunyibua tshia ikalaku-kashidi ntshivuluiji tshidi tshikoka ntema tshia se: nansha mu nsombelu mikole, tudi mua kutantamena bituababidila mishindu idiku. Yehowa udi utushindikila ne: ditantamena dia mushindu’eu neditufikishe ku ‘dipiana malaya,’ ùmvuijà mu ngakuilu wa ku dîna kuikala ne muoyo bua kashidi.​—Ebelu 6:12; Matayo 25:46.