Nsombelu webe mmulombola kudi tshimana-kufunda anyi?

“ALA NÒ DON.” Mu muakulu wa Bambara wa mu Mali, ku Afrike wa ku Ouest, tshiambilu etshi tshidi tshiumvuija ne: “Mmudimu wa Nzambi.” Bikemu bu etshi mbimanyike kuonso mu tshitupa atshi tshia buloba. Mu muakulu wa Wolof, batu bamba ne: “Yallah mo ko def” (Nzambi wakenza nanku). Ne mu umue muakulu wa bena Dogon, badi bamba ne: “Ama biray” (Nzambi wakabuenzeja).

Biambilu ebi mbiambulula mu mishindu minga mu matunga makuabu. Miaku bu eyi: “Dîba diende dikavua dikumbane” ne, “Tshivua disua dia Nzambi” idi misangu mivule yumvuika padi lufu nansha njiwu ikuata bantu. Mu Afrike wa ku Ouest, bikemu bu mudi “Muntu wamba muende, Nzambi wamba muende” bitu pa tshibidilu bifunda ku mashinyi a bisalu, ne bilamika bu bimanyinu mu bipanyishilu. Bua bavule biambilu ebi bidi anu mishindu ya mu diakula. Nansha nanku, misangu ya bungi bidi bileja ditabuja dikole mu tshimana-kufunda.

Kadi ditabuja tshimana-kufunda ntshinyi mene? Tshibungu kampanda (The World Book Encyclopedia) tshidi tshiumvuija ne: “nditabuja dia se: malu onso akadi majadika kudi makole adi bantu kabayi mua kukokesha.” “Mmakole” kayi aa? Kukadi binunu bia bidimu, bena Babilone bavua bitabuja ne: tshimana-kufunda tshia muntu ne muntu tshivua ku buenzeji bukole bua tshimuenekelu tshia mitoto ku diledibua diende. (Fuanyikija ne Yeshaya 47:13.) Bena Greke bavua bitabuja ne: tshimana-kufunda tshivua mu bianza bia banzambi-bakaji basatu ba bukole bavua baluka buanda bua muoyo, bapima bule buabu, ne babukosa. Kadi, bena teoloji ba Bukua-buena-nkristo ke bakalua kupatula lungenyi lua se: Nzambi nkayende udi ujadika tshiafikila muntu ne muntu!

Tshilejilu: Augustin “Munsantu” wakabenga “mmuenenu ya dishima ne minyangi ya lungenyi” ya bena lubuku lua mitoto. Ku luseke lukuabu, wakamba se: “kuitaba ne: Nzambi udiku, ne kuvila ne: Kêna ne didianjila-kumanya dia malu atshidi kumpala, atshi ke dileja patoke menemene dia bupâle.” Wakamba se: bua Nzambi kuikala bushuwa wa bukole-buonso, udi ne bua “kumanya malu onso kumpala kua kaayi manji kuenzeka” pa kubenga kushiya “tshintu nansha tshimue katshiyi tshimana kulongolola.” Pabi, Augustin, musakibue kudi dijinga dikole, wakamba ne: nansha mudi Nzambi mudianjile kumanya bionso bidi bienzeka, bushuwa bantu badi pabu ne budisunguidi.​—The City of God, Mukanda V, Nshapita 7-9.

Kunyima kua siekele mivule, Jean Calvin, muena teoloji wa bena Mishonyi, wakalubuluja kabidi lungenyi elu, pa kuamba ne: padi eku bamue “bafundila [kudi Nzambi] bua kuikala bana ne bapianyi ba bukalenge bua mu diulu,” bakuabu mbafundila bua kuikala “bakididi ba tshiji tshiende”!

Lelu’eu, ditabuja tshimana-kufunda ndianyishibue mu miaba mivule pa buloba. Tangila bualu bumona kudi Ousmane, nsongalume wa ku Afrike wa ku Ouest. Uvua umue wa ku balongi ba tshitembu mu tshilongelu tshiende, kadi pakenzaye mateta ende a ndekelu, wakapangila! Ebi kabivua anu biumvuija dilongolola tshidimu atshi, kadi bivua biumvuija kabidi ditatshishibua ne mêyi mabi kumpala kua dîku diende ne balunda bende. Mulunda wende kampanda wakakeba bua kumusamba pa kuamba ne: bivua disua dia Nzambi. Bia muomumue, mamuende wa Ousmane wakadiula tshimana-kufunda bua dipangila diende.

Diambedi Ousmane wakasanka bua kuitaba madikolela abu a busambi. Ndekelu wa bionso, dipangila diende divua bushuwa disua dia Nzambi, kakuvua tshintu nansha tshimue tshivuaye mua kuenza bua kudiepuka. Kadi tatuende uvua ne mmuenenu mukuabu. Wakambila Ousmane se: dipangila diende ku mateta divua tshilema tshiende yeye​—ki ntshia Nzambi nansha. Ousmane wakabula anu bualu uvua mulengulule malonga ende.

Ne ditabuja diende mu tshimana-kufunda dimana kutekesha, Ousmane wakapangadika bua kukonkonona nkayende malu aa. Tudi tukulomba mpindieu bua kuenza bia muomumue pa kutabalela tshiena-bualu tshidi tshilonda.