Bamanyishi ba Bukalenge badi balonda

Malelela a mu Bible mmatungunuke ne kumanyishibua mu Irlande

BIDIMU bishal’ebi, ditunga edi dia kubandila dia Irlande ndilue kuikala muaba wa tshimvundu tshikole. Mu tshine tshikondo etshi, bena Irlande mbandamune ne dianyisha ku mukenji wa ditekemena wa mu Bible mubatuadila kudi Bantemu ba Yehowa. Malu mamona adi alonda aa a ku Irlande adi ajadika bualu ebu.

▪ Ku Dublin umue wa ku Bantemu ba Yehowa ne muanende mutekete wa bakaji bavua mu mudimu wa buambi bua ku tshiibi ne ku tshiibi. Kupetanganabu ne mukaji kampanda uvua ne dîna se: Cathy, uvua ne bivule bia kuenza bua bana bende ba bungi. Ntemu eu wakebeja muanende wa bakaji, utshivua ulonga mushindu wa kuyisha, né uvua mua kuabanyangana mukenji ne mukaji eu mu mêyi makese. Cathy wakanyisha, ne muana wa bakaji eu mutekete wakafila bumanyishi bupepele, bua meji. Cathy wakakemeshibua bikole bua muvua muana eu muleje patoke muoyo umue ne kanemu, ne wakitaba bua kuangata trakte mumvuiji wa Bible.

Pashishe Cathy wakelangana meji pa didilongolola dimpe dia muana uvua mumukumbule ne bibidilu biende bimpe. “Mvua mukemeshibue bua muvua muana wa bakaji mukese mua kufila mukenji muimpe bu nunku kayi ukoka ntema kudiye yeye muine,” ke muakambaye. “Ngakangata dipangadika dia se: musangu udi ulonda pankumbula Bantemu ba Yehowa, nembateleje.”

Mu tshine tshikondo atshi Cathy wakamuangala mu tshimenga tshikese mu Irlande wa ku Sud-Ouest pabuipi ne muelelu wa komté ya Cork ne Kerry. Tshikondo kampanda kunyima Bantemu ba Yehowa bakalua kukokola kuende, ne wakabakidila mu nzubu muende. Wakitaba dilonga dia Bible dia pa tshibidilu ne mpindieu udi ubuela mu bisangilu bia tshisumbu pamue ne bavule ba ku bana bende. Cathy udi ne dianyisha bua dijinga dilelela dia muana wa bakaji eu mukese dia kuabanyangana nende lumu luimpe.

▪ Mu tshitupa tshia Tullamore, Bantemu bavua benze mayukidilangana pa Bible ne mukaji kampanda uvua ne dîna se: Jean, munkatshi mua bidimu muanda-mutekete. Imue misangu uvua uleja disankidila ne wanyisha mikanda, kadi mikuabu misangu disankidila diende divua dianji kujimina. Dimue dituku, pakalua Ntemu mukuabu uvua ubikidibua ne: Frances ne muinende kukumbula Jean, bakamusangana ne bunyengu bukole. “Malu kayi onso atuvua tuamba,” ke mudi Ntemu eu ulonda, “uvua anu utamba kufiika munda. Ndekelu wa bionso, wakatuambila bua tuetu kujimina kumpala kuende, ne kuinjilaye tshiibi tshiende pa kutshikuma bikole.”

Frances wakadiebeja bu bikala makumbula makuabu ne bua kupeta diakidibua dia muomumue. ‘Pamu’apa ki mbikumbanyine kabidi bua kumukumbula bikalaye kayi usankidila bushuwa mukenji eu,’ ke muakela Frances meji. Kadi, wakayukidilangana ne bayende, Thomas, pa muanda eu ne yeye wakamueneka muikale ne ditekemena dia bungi. Musangu wakalonda uvuabu mu tshitupa atshi, bakakumbula kabidi Jean. Wakabakidila ne bulunda ne kuanyishaye bibejibeji bia Tshibumba tshia Nsentedi ne Réveillez-vous! Makumbula akalonda avua anu asankisha, ne Thomas ne Frances bakatuadija nende dilonga dia pa tshibidilu dia Bible dia ku nzubu.

Bua tshinyi dishintuluka edi? Jean udi umvuija ne: tshikondo tshivuaye kayi utamba kunemeka Bantemu, uvua utshifumina ku dilela ne utshipatukilaku mu lupitadi. Bu muvuaye wamusha muanende wa katoto ne udiisha mukuabu wa pambidi ukavua mubandile, uvua ulala amu dîba dimue ne tshitupa butuku. “Tshintu tshia ndekelu tshimvua musue kuenza,” ke mudi Jean wamba, “tshivua diakula pa malu a Nzambi.”

Kunyima kua ngondo ibidi Jean ukavua ubuela mu bisangilu bionso bia tshisumbu, ne ngondo inayi pashishe ukavua udifila mu mudimu wa budimi. Ngondo dikumi kumbukila ku tshikondo tshiakatuadijaye dilonga diende dia Bible, wakatambuishibua. Mpindieu malu àdì mamuenzekele yeye muine adi amuambuluisha mu mudimu wende. Udi ulonda ne: “Pandi mpeta muntu kampanda udi ne malu makolakane, ndi nteta bua kumumvuila bikole. Ntu pa tshibidilu mfunda bualu ebu. Bumue nsombelu neashintuluke pangapingana musangu mukuabu; muntu udi mua kudiumvua bimpe ne kuandamuna biakane.”