“Yehowa wakandamuna ku masambila anyi!”

PA BULOBA bujima, Bantemu ba Yehowa badi balombola malonga a Bible a ku nzubu matue ku miliyo itanu ne bantu badi badifile bua kupeta dimanya dijalame dia Nzambi ne dilongolola diende dia mpatshi bua bukua-bantu. Nansha bana badi pabu benza mudimu eu munkatshi mua Bantemu ba Yehowa. Tuangate bu tshilejilu, muana kampanda wa balume mubikidibue ne: Joel. Wakaleja diditshipa diende kudi Yehowa ne kutambuishibua ne bidimu tshitema. Panyima pa tshidimu tshimue wakamona bualu ebu:

“Mukuabu musangu mu buambi, meme kututakena ne muntu mukaji kampanda mubikidibue ne: Candy. Ngakamupesha broshire wa ‘Monayi, ndi mvuija bintu bionso bipiabipia.’ Ukavua nende, nunku ngakamupesha mukanda wa Udi mua kuikala ne muoyo wa kashidi pa buloba bukudimuna mparadizu. Ukavua kabidi mumane kuupeta. Apu meme kudiambila se: nendombe mamu eu dilonga dia Bible. Yeye kuitaba!

“Muanabu ne Candy wa bakaji, uvua mu njila wa lufu bua kansere, wakalua kusombela kuende. Kusakidila apu, Candy uvua ulonga bu-munganga. Nanku tuakimanyika dilonga dia Bible bua lupolo kampanda. Kadi baledi banyi ne meme muine tuakashala tupetangana nende pa kumushiila yeye anyi bayende Dick bibejibeji. Wakatuambila ne: Candy uvua ulama bibejibeji ebi ku mutu kua bulalu ne uvua ubibala butuku.

“Ndekelu wa bionso, muanabu ne Candy wa bakaji wakafua. Tatu ne mamu ne meme muine tuakayukila ne Candy pa ngikadilu wa bafue. Wakapangadija bua kutuadijilula dilonga diende dia Bible. Dituku dikuabu, tuakebeja Dick né uvua mua kusua bua kulonga pamue ne Candy ne nunku kuenzabi dilonga dia Bible dia dîku. Wakamona se: tshivua meji mimpe. Nanku mpindieu, meme pamue ne tatu, ndi ndonga ne bonso babidi: Dick ne Candy. Badi benza dilubuluka dilenga ne baleja dianyisha bua dilonga dia Bible.

“Mvua anu nsambila bua dilonga dia Bible, ne Yehowa wakandamuna ku masambila anyi!”