“Tudi bonso bena dîku dimue”
MU BIDIMU bidi panshi ebi ngenyi midianjila kufumba ya bena bitendelelu ne kansungasunga ka makoba mbitangalake buloba bujima. Mashilangana pa bisa mmakebeshe dishipangana, tshikisu, ne binyangu bikuabu bikuate ne bundu. Bilondeshile luapolo lua Amnesty International, dishipa dia manême a bantu diakenzeja ku bukole miliyo ya bantu mipite pa 23 pa buloba bujima bua kunyema ku mabu mu 1994.
Mu Rwanda nkayamu, bantu bafike ku 500 000 bavua bashipibue ne bakuabu bapite pa 2 000 000 bakalua bena tshimuangi panyima pa dibudika dia tshinyangu pankatshi pa ba-Tutsi ne ba-Hutu. “Nangananga Bantemu ba Yehowa bavua bakengeshibue,” ke mudi tshikandakanda tshia bena Belgique tshia Le Soir tshiamba, “bua dibenga diabu dia kuambula bingoma.” Bantemu ba Yehowa kabatu badibueja mu bimvundu bia mvita to. Nansha nanku, nkama ya kudibu bavua bashipibue mu tshinyangu. Ebi bidi bituvuluija miaku ya Yezu kudi bayidi bende ne: “Munudi kanuyi ba ku bena bulongolodi ebu, . . . bena bulongolodi ebu badi banukina.”—Yone 15:19, NW.
Dîku kampanda dia Bantemu—Eugène Ntabana, mukajende, ne bana bende babidi—bavua basombele mu tshimamuende wa bukalenge, mu Kigali. Pavuaye umvuija ndubidilu wa bena nkristo kudi bena mutumba nende, Eugène uvua misangu mivule wakula bua bilongo bia bougainvillée, biena mutshi utu ulamba ne usampila mu tshikondo tshia luya.—Matayo 22:21.
“Munemu mu Kigali,” ke muvua Eugène umvuija, “bougainvillée udi wela bilongo bikunze, bikunzubile (rose), ne imue misangu bitoke. Pabi bionso mbia mu dîku dimue. Bidi muomumue bua bantu. Nansha mutudi mua kuikala bena makoba anyi bisa, peshi bafumine ku bisamba bishilangane, tudi bonso bena dîku dimue, dîku dia bukua-bantu.”
Bikuate ne buôwa, nansha muvuabu bena ngikadilu wa ditalala ne bena ndubidilu, dîku dia Ntabana diakashipibua kudi tshisumbu tshia bantu bàvuà ne nyota ya mashi. Nansha nanku, bakafua ne lulamatu. Tudi mua kuikala bashindike se: Yehowa Nzambi neakumbaje dilaya diende kudi bantu ba nunku, ne nebabiishibue bua kupiana bulongolodi buikala kabutshiyi kabidi ne ngenyi midianjila kufumba. (Bienzedi 24:15) Tshikondo atshi, dîku dia Ntabana, pamue ne bakuabu, “mioyo yabu neyisanke mu ditalala [“divulavulayi,” NW].”—Musambu wa 37:11.