‘Badi ne disanka mu diambuluisha bakuabu’

KE TSHIAKAMBA mpulushi kampanda wa mu tshimenga tshia New York bua Bantemu ba Yehowa. Uvua wakula ne Kathleen, umue wa ku badisuile ba ku dîba ne ku dîba badi basadila ku tshilombuelu tshia buloba bujima tshia Bantemu ba Yehowa ku Brooklyn, mu New York.

Pavuaye udia biakudia bia midi, dituku kampanda dia munya ne luya mu muvu wa automne, Kathleen wakasomba pa tshibasa pabuipi ne Promenade. Uvua uteleja kasete kikale ne bitelejidi bia mu matshi. Ku tshipalu tshia ndeke ya elikoptere dia muamua dia mâyi a East River, malongolola avua enda enjibua bua diumbuka dia pape, uvua ukumbula tshimenga. Bukubi buvua bukole mu miaba yonso, ne bampulushi bungi bukumbane bavua bakontolola Promenade. Umue wa kudibu wakasemena pabuipi ne Kathleen ne kumuebeja tshivuaye wenza. Kathleen wakandamuna ne: “Ndi nteleja kasete ka mu tshiena-Russe. Udi mumanye’s, ndi umue wa ku Bantemu ba Yehowa, ne ndi musue kulonga tshiena-Russe bua meme kuabanyangana lumu luimpe lua Bukalenge bua Nzambi ne bantu badi bakula tshiena-Russe badi balue bua kusombela mu tshimenga etshi.”

Mpulushi wakandamuna ne: uvua wenda ufika ku dianyisha Bantemu ba Yehowa munkatshi mua bidimu biende 15 bu mfumu mutangidi wa bampulushi mu tshimenga tshia New York. Wakamba ne: “Ndi ngangata Bantemu ba Yehowa bu tshitendelelu tshilongolola tshidi ne benatshi badi ne disanka mu diambuluisha ne muoyo mujima bantu bakuabu mu tshinsanga.”

Bantemu ba Yehowa mbamanyike mu buloba bujima bua mudimu wa diyisha ku nzubu ne ku nzubu udibu benza. (Bienzedi 20:20) Padibu bafunkuna Bukalenge bua Nzambi bu mushindu umuepele wa kujikija ntatu idi ikengesha bukua-bantu, badi kabidi bambuluisha bantu bua kuakaja nsombelu wabu pa kubakankamija bua kutumikila mêyi-maludiki a Bible mu nsombelu yabu ya ku dituku ne ku dituku. Tshilejilu, Bantemu badi babela baledi bua kupetesha nsombelu udi wambuluisha bua kulonga ku nzubu. Badi basengelela bantu bua kuikala bena bululame ne batumikidi ba mikenji, babakankamija bua kupeta nzanzu ne ngikadilu idi mfumu kampanda wa mudimu mua kuanyisha.

Eyowa, Bantemu ba Yehowa badi ne disanka divule mu diambuluisha bantu mu tshinsanga bua kuakaja nsombelu yabu. Udi mubikidibue ne musangelu bua kuandamuna ku dilomba didi dilonda edi.