Bamanyishi ba Bukalenge badi balonda

Diangata dipangadika dikole mu tulasa didi difutshibua

BIBLE mmudianjile kuamba ne: “Bana bebe bonso nebikale bantu balongeshibue kudi Yehowa, ne ditalala dia bana bebe nedikale divule.” (Yeshaya 54:13, NW) Mu mushindu mualabale, tudi mua kutumika ne ka-tshiambilu “bana bebe bonso” bua tshisumbu tshijima tshia basadidi ba Nzambi pa buloba, nansha aba batshidi batekete menemene. Lelu’eu, baledi bena nkristo mbajadike mudi bana babu bikale “balongeshibue kudi Yehowa” ku nzubu ne mu bisangilu bia bena nkristo.

Kadi, padibu baya mu tulasa, bena nkristo bansonga badi batuilangana ne ntatu mikole. Misangu mivule badi bamona mushinga wa kuangata dipangadika dikole diashila pa bidibu balonge mu Bible. Padibu benza nunku, bipeta bidi mua kuikala ne dikuatshisha kudi balongi ne balongeshi kabidi, anu bu mudibi bileja kudi bualu buenzeke budi bulonda ebu bua mu Micronésie.

Mu tshidiila tshikese tshia ku Ouest wa Pasifike tshia Tol mu Bidiila bia Chuuk, balongeshi ba mu tshilongelu tshia muaba eu bakambila bana bonso bua kudilongolola ne kudifila mu disekelela dia difesto dia Halloween mu tulasa. Bakavua bamanyishe balongi Bantemu ne: disekelela edi divua ne bua kukonga bimfuanyi bilengeja ne bilamba bia kuvuala bikale bizola spiritu mibi, bifuebe, ne baloji​—bionso ebi bikale bisuikakaja ku bilele bia ditendelela spiritu. Bana aba kabavua mua kudifilamu pa kulonda kuondo kabu ka muoyo.a

Ku dishidimunyibua diabu diashila pa Bible dia ku nzubu ne mu tshisumbu tshia bena nkristo, bavua bamanye se: bilele bu nunku kabiena bisankisha Nzambi, nansha biobi bienza anu bua kujikija lutetuku patupu. Bua kubambuluisha bua kumvuija mmuenenu wabu mu mushindu mutambe kutoka, bana aba bakabikila Barak, umue wa ku ba-misionere Bantemu ba mu tshidiila atshi, bua kuakulaye ne balongeshi babu.

Bamane kuteleja diumvuija, balongeshi bakadilongolola bua tshisangilu tshibidi, muvua Barak ne bua kuyukila ne tshisumbu tshionso tshia bena mudimu ba tshilongelu atshi. Mu tshisangilu etshi, Barak wakumvuija malu bua kuleja bushuwa tshidi Halloween muikale. Uvua mupete mamanyisha ende mu mikanda mivule ya Société Watch Tower ne mu mikanda mikuabu kabidi. Balongeshi ne balombodi bakakemeshibua bikole pa malu akumvuabu àvuà atangila mbangilu wadi, malu àdì a kale, ne ngikadilu wadi wa malu a ntendelelu. Bakumvuangana bua kuenza tshisangilu tshia bena mudimu bonso bua kumona mushindu wa kujikija muanda eu.

Matuku makese pashishe, dipangadika divua kadiyi ditekemena diakamanyishibua. Malongolola onso a Halloween avua enda ashipibua. Tshilongelu etshi katshivua kabidi ne bua kusekelela Halloween tshidimu atshi. Ntshipeta kayipu tshimpe tshiakafumina ku dipangadika dia Bantemu bansonga aba dia kuenza tshidi tshiakane mu tulasa! Bana batekete kabena ne bua kutshinyishibua anyi kufua bundu bua kuleja mmuenenu wabu mushindame wa bulelela bua mu Bible.

Pa buloba bujima, Bantemu ba Yehowa badi balongesha bana babu bua kulongabu ne disuminyina mu tulasa. Bantemu bansonga mbalongeshibue kabidi bua kuikala ne nsombelu mulombola kudi mêyi-maludiki a mu Bible ne bua kuabanyangana ditekemena diabu ne mitabuja abu ne balongi bakuabu padibu bapeta mushindu. Nansha padi bipeta kabiyi bimpe anyi bipeteka diakamue bu muvuabi mu bualu ebu, bansonga badi mua kuikala ne dieyemena ne disankishibua bidi bifumina ku dienza dia tshidi tshiakane. Ne kupita apu kabidi, badi mua kujadika se: Tatuabu wa mu diulu udi usankishibua ne neababeneshe bua butumike buabu bua lulamatu.

[Mêyi adi kuinshi]