Mbanganyi bikala bamuangalaji ba evanjeliyo?

MU TSHISANGILU kampanda tshia Nsangilu wa Bitendelelu bia Buloba bujima kukadi bidimu bu 40, bakalomba benamu bua “kutuadija diakamue ne lungenyi lua diyisha evanjeliyo” ne kulongesha bisumbu biabu bia mikoko bua “kuya mu dimuangalaja evanjeliyo.” Bidimu bitanu pashishe, John A. O’Brien, munene kampanda muena Katolike, wakafunda bua dikengela dia kuenza bayidi bapiabapia “pa kuya kudibu” kabiyi amu “pa kusomba ku metu” patupu. Ne mu Tshiongo 1994, Pape Jean Paul II wakamba ne: “ki ntshikondo tshia kufua bundu bua Evanjeliyo to, ntshikondo tshia kumuyishila pa misonga ya nzubu.”

Mbimueneke patoke se: mbila eyi ya ku misangu ne ku misangu bua bamuangalaji ba evanjeliyo mmipone mu matshi a bena mapapa. Tshiena-bualu kampanda mu tshikandakanda tshia Illawarra Mercury tshia mu Australie tshiakamba ne: “Banene bena Katolike ba ku Muelelu wa ku Sud ki mbasue kuitaba ditumika ne mushindu wa muomumue ne wa Bantemu ba Yehowa mu ditabuja diabu.” Muntu mukuabu wakamba ne: diyisha evanjeliyo “kadiena mu ngelelu wa meji wa bena Katolike” nansha. Mukuabu wakela meji ne: “Mbimpe bua Ekleziya alubuluke yeye nkayende, kadi ki mmu dienda dikokola ku biibi nansha. Pamu’apa nebitambe kuikala bimpe ku diambuluisha dia tulasa anyi mu tushete tua mikanda.” Nansha mukulu wa dioseze dia muaba au kavua mujadike menemene mushindu wa kumvuija mêyi a pape. “Tuvua mua kukankamija bantu bua kulamata Evanjeliyo udibu bamanye ku diambuluisha dia nsombelu wabu buobu nkayabu,” ke muakambaye. “Pikalabi biumvuija dienda dikokola ku biibi abu mbualu bukuabu.” Mutu wa tshiena-bualu tshia ngumu eyi wakamba bimpe bualu ebu mu tshikoso ne: “Bena Katolike kabakulonda dibikila dia Pape dia kuyisha nansha.”

Nansha mudiku dipangila dia Bukua-buena-nkristo dia kumuangalaja evanjeliyo, Bantemu ba Yehowa bapite pa miliyo itanu badi balonda dîyi-dituma dia Yezu dia ‘kuya ne kuvuija ba bisamba bionso bayidi.’ (Matayo 28:19, 20; fuanyikija ne Bienzedi 5:42.) Diyisha diabu ku tshiibi ne ku tshiibi didi dienjibua mpindieu mu matunga mapite pa 230. Mukenji udibu batuala mmukenji muimpe, ùdì uzangika malaya a dikema a mu Bible bua matuku atshilualua. Bua tshinyi kubenga kuyukila nabu pakukumbulabu musangu walonda?