Masanka a mutshima mupole

MU MALU a luondapu a lelu, mbamanye katshia ku kale se: tshiji tshinekesha tshidi ne buenzeji bunyangi pa mubidi wa muntu. Bidimu bipite pa lukama, tshikandakanda tshia The Journal of the American Medical Association (JAMA) tshiakamba ne: “Muntu kampanda udi ufua bua tshiji tshikole, ne badi bamba ne: pamu’apa uvua ne muoyo mutekete, ùvuà kauyi mua kupita ne disumpakana dikebesha kudi ngikadilu wende wa mu lungenyi. Mbimueneke se: muntu nansha umue kêna wela meji ne: bualu ebu budi anu nkomenu wa mulongolongo wa dikuatshika tshiji tshia nunku, tshidi tshiotshi tshine tshikebeshe butekete ebu.”

Mêyi adi kuulu eku kaena akemesha balongi ba Dîyi dia Nzambi, Bible. Siekele bu 29 kumpala kua tshikandakanda tshia JAMA kuakulatshi pa njiwu ya ngikadilu mubi, Mukalenge Solomo wakenzejibua ku spiritu bua kufunda ne: “Mutshima mu[p]ole udi muoyo wa mubidi.” (Nsumuinu 14:30) Mêyi aa atshidi malelela too ne lelu’eu.

Pa kulama ngikadilu mupole, tudi tuepuka masama a bungi atu misangu mivule masuikakaja ku tunyinganyinga, bu mudi luendu lukole lua mashi, masama a mutu, ne ntatu ya dieyela. Nansha nanku, kusakidila ku makanda a mubidi mimpe, malanda etu ne bakuabu nealubuluke bituenza madikolela bua ‘kulekela tshiji ne kubenga dibinduluka.’ (Musambu wa 37:8, MMM) Bantu bavua bakokibua pa tshibidilu kudi Yezu bua ngikadilu wende mulenga ne diditatshisha diende dilelela bua bualu buabu. (Mâko 6:31-34) Bia muomumue, netuikale mpokolo wa dikankamija kudi bakuabu bituadima mutshima mupole.​—Matayo 11:28-30.