Wa kudiula bua mvita nnganyi?

NZAMBI ke wa kudiula bua mvita miluangana kudi bukua-bantu anyi? “Tòo, Nzambi ki mmusue mvita nansha.” Ke muakandamuna Martin Niemöller, munene kampanda mumanyike bimpe wa ekleziya wa bena Mishonyi mu Allemagne, ku lukonko elu katupa kîpi panyima pa Mvita Mibidi ya Buloba bujima. Mumvuija ende avua mapatula mu 1946 mu mukanda mubikila ne: Ach Gott vom Himmel sieh darein​—Sechs Predigten (O Nzambi, tangila kumbukila mu diulu​—Miyuki isambombo).a Mukanda udi wamba ne:

“Eu yonso udi musue kudiula Nzambi bua [mvita] ki mmumanye, peshi ki mmusue kumanya, Dîyi dia Nzambi. Bushuwa, bidi bualu bushilangane bituikala tuetu bena nkristo bambule anyi katuyi bambule tshitupa tshinene tshia dipiila mu mvita eyi ikena ijika. Ne katuena mua kuepuka lukonko elu bipepele. . . . Tudi kabidi mua kuvuluijibua ne dijalama dionso ne: ekleziya ya bena nkristo, mu kupita kua bikondo, mmidifile misangu ne misangu mu dibenesha mvita, basalayi, ne bia-mvita, ne se: yakasambila mu mushindu ukena wa Buena-nkristo menemene bua kulomba dibutudibua dia bena lukuna babu ku mvita. Bionso ebi ntshilema tshietu ne tshia bankambua betu, kadi Nzambi ki ng’wa kudiula nansha kakese. Ne tuetu bena nkristo ba lelu tudi bafue bundu ku mêsu kua badibu babikila ne: katendelelu ka Balongi ba Bible ba Tshisumi [Bantemu ba Yehowa], bakaya nkama ne binunu mu tumponya tua disubishilangana ne bakafua [mene] bualu bakabenga kusadila mu mvita ne kuasa bantu bingoma.”

Lelu’eu, bidimu bitue ku 50 panyima pa Mvita Mibidi ya Buloba bujima, mêyi a Niemöller adi apetesha bantu banangi ba ditalala malu a kueleelabu meji ne lubatshi. Tòo, Nzambi ki ng’wa kudiula bua diela mashi panshi dia bisamba! Bushuwa, ku butuangaji bua bamutendeledi balelela, bàdì kabayi babuelakana mu mvita ya bulongolodi ebu, Nzambi udi umanyisha ndekelu ukadi pabuipi wa mvita yonso.​—Musambu 46:9; Yone 17:16.

[Mêyi adi kuinshi]

[Mêyi a dianyisha bua tshimfuanyi mu dibeji 32]

USAF photo