“Anu umue wa ku mioyo mivule iuvua mulenge”

KU NTUADIJILU mu Tshiongo 1996, Carol uvua usama tshiûja tshia mu buongo. Uvua mu tshidimu tshiende tshia 60 ne too ne tshikondo atshi, uvua anu muikale muena disanka, mukaji wa mukitshi muikale ne mêyi mimpe bua muntu yonso. Kadi mpindieu ba-doktere bavua baluangana mua kupita ne didiunda dia disama. Munkatshi mua disumpakana diende, Carol wakapeta mukanda udi ulonda eu:

“Musuibue Carol:

“Ndi ne dibungama dia bungi bua dinyanguka dia makanda ebe a mubidi. Diakalenga, tudi ne ditekemena dilelela didi Bible utuambuluisha bua kumanya ne kunanga. Ditekemena edi mbua Bukalenge bua Yehowa kukokeshabu buloba bua tuetu kumona mua kuikala ne muoyo mu nsombelu wa mu mparadizu, tshikondo tshitudi bonso batekemene.

“Ndi musue bua umanye ne: mudimu webe wewe muine wa diyisha mmusungile bantu bavule ku lufu lua kashidi. Ndi umue wa ku bantu aba. Ndi ngelakana né udi muvuluke musangu wa kumpala utuakapetangana nebe. Musangu au mvua ne bidimu 20. Mvua ne nsuki mile, nsumbisha diamba, ne mpitshisha dîba pamue ne dingumba dia bena tshinyangu. Tuvua bonso ne bingoma ne katuvua ne dinanga dia bushuwa bua bakuabu pa kumbusha buetu tuetu bine.

“Wakakonkola ku tshiibi tshianyi pamue ne Ntemu mukuabu ne wakampesha Tshibumba tshia Nsentedi ne Réveillez-vous! Ngakateta kunupesha dolare umue ne meme kuamba ne: tshivua musue bibejibeji nansha. Nuakammanyisha ne: kanuvua bapatuke anu bua kupeta mapa. Nuakangambila ne: nuvua nuenza mudimu bua kuambuluisha bantu bua kubalabu Bible. Tshiena mujadike né ngakangata bibejibeji peshi né ngakabibala. Nansha nanku, nuakakuna dimiinu dia bulelela mu nsombelu wanyi.

“Ndambu wa bidimu panyima Ntemu mukuabu, Gary, wakalua kumbelu kua mamuanyi pamvuapu. Ngakamuambila bua dikumbula dinuvua benze ndambu wa bidimu kumpala. Gary wakalonga nanyi Bible mu lupolu lule too ne pangakatambuishibua ndekelu wa bionso mu 1984. Mpindieu ndi ndongesha bana banyi bulelela bua Bukalenge bua Nzambi.

“Ndi mushindike se: ndi anu umue wa ku mioyo mivule iuvua mulenge mu bidimu biebe bia mudimu wa lulamatu. Nansha nanku, ku diambuluisha dia bulenga ebu bua dinanga, udi mumpeteshe meme ne dîku dianyi mushindu wa kufika ku dimanya Nzambi Munene, Yehowa, ne Muanende, Yezu Kristo. Ndi mutekemene dituku dindi mua kukumona mu ndongoluelu mupiamupia wa malu, pakupula Yehowa tshinsonji tshionso ku mêsu kuetu, ne lufu kaluyi luikalaku kabidi.​—Buakabuluibua 21:4.

“Buanyi meme ne dîku dianyi, tudi ne disanka bua mutuvua ne diakalenga dia kukumanya ne dia kuikala tshitupa tshia mudimu webe wa difila bumanyishi. Tuasakidila.

“Ne dinanga dia buena-muntu,

Peter”

Panyima pa disama dia ngondo isambombo, Carol wakafua mu Luabanya 1996, mumane kukuna mamiinu mavule a bulelela munkatshi mua bidimu biende 35 bu mumuangalaji wa lukunukunu wa evanjeliyo. Wakalonga ne: muntu katu mumanye dîba dikala dimiinu mua kukuama mamuma, nansha bidimu bivule panyima.​—Matayo 13:23.