Nnganyi udi mukokeshi?
“NNGANYI udi ukokesha bulongolodi ebu?” Bu muntu mua kukuela lukonko elu, mmunyi muuvua mua kuandamuna? Bantu bavule bena malu a Nzambi badi mua kuamba ne: “n’Nzambi” peshi “n’Yezu.” Tshiena-bualu kampanda tshidi mu The Freeport News, tshikandakanda tshia mu Bahamas, tshiakafila diandamuna didi bantu bakese mua kutekemena.
“Ngakasangana trakte pa tshibuelelu tshianyi,” ke mudi mufundi wa tshiena-bualu atshi utuadija. “Pa tshibidilu tshivua mua kubala tshintu tshishiya nunku to, kadi bua musangu eu ngakangata dipangadika dia kutshibala. Tshiena-bualu tshivua tshiela lukonko ne: ‘Nnganyi udi bushuwa mukokeshi wa bulongolodi ebu?’” Pa kubala trakte eu mushindamene pa Bible, mukaji eu wakamanya ne: mukokeshi wa bulongolodi ebu kêna né Nzambi né Yezu kadi n’Satana Diabolo.—Yone 12:31; 14:30; 16:11; 1 Yone 5:19.
“Bantu badi bakengeshangana ne tshikisu kakuyi luse nansha lukese,” ke mudi trakte eu umvuija. “Anjibi kuela meji ku chambre à gaz, maloko a camps de concentration, bingoma bia lance-flammes, ne bombe ya napalm, ne mishindu mikuabu ya tshikisu ya dikengeshangana ne dishipangana kabiyi luse nansha kakese. . . . Mmakole kayi adi asaka bantu ku bienzedi bia muendi ne ababueja mu nsombelu idibo badiumvua benzejibue bua kuenza malu a tshikisu tshia mushindu’eu? Kuenaku muanji kudikonka pebe bikalaku bukole kampanda bubi bukena-bumueneka budi busaka bantu ku bienzedi bibi anyi?” Bidi bikemesha bua mudi Bible ubikila Satana ne: “nzambi wa ndongoluelu eu wa malu” anyi?—2 Kolinto 4:4, NW.
Diakalenga, tshikondo tshikadi pabuipi tshikala Satana ne ba-demon bende kabatshiyiku kabidi. “Bulongolodi ebu budi bupita ne dijinga diabu kabidi, kadi eu udi wenza disua dia Nzambi udi ushala kashidi.” (1 Yone 2:17, NW) Eyowa, Bible udi ulaya ne: aba bàdì benza disua dia Nzambi badi ne ditekemena dia kuikala ne muoyo wa kashidi mu bulongolodi bupiabupia bua buakane. (Musambu 37:9-11; 2 Petelo 3:13; Buakabuluibua 21:3, 4) Ndisulakana kayipu dikalaku bua diumushibua dia buenzeji bubi bua Satana ne ba-demon bende!
Panyima pa diamba mu tshikoso malu a mu trakte eu mukese, mufundi wa The Freeport News wakakomesha ne: “Bushuwa ndi ne disanka dia bungi mumvua mubale trakte au . . . bualu meme panyi mvua nditatshisha pa bidi bitangila ngikadilu wa bulongolodi ebu, ne eu udi ubukokesha.”