Ditabuja kudi Nzambi—Didi ne bua kulomba tshishima anyi?
ALBERT uvua ku ntuadijilu wa bidimu biende bia 20 pakatuadijaye kukeba Nzambi. Wakateta bungi kampanda bua bitendelelu kadi wakashala kayi musankishibue. Mu dibala bitupa bia Bible, wakamanya muvua Nzambi muenzele bantu bu mudi Nowa, Abrahama, Sara, ne Mozese malu. Albert wakadiumvua mukokibue kudi Nzambi eu wa mu Bible. Kadi, uvuaku mua kujadika ne: Nzambi udiku bushuwa anyi?
Dimue dilolo Albert wakadikokela ku muaba muditole wa pa nkayende kuakasambilaye ne: “Suaku Nzambi, umpe tshimanyinu—tshintu kayi tshionso tshidi tshijadika ne: udiku.” Albert e kuindila kupanga. Udi uvuluka ne: pakapangikaku kuenzeka bualu, ditekemena diende “diakandamuka bundu, tshianana, tshiji.”
Bu Albert, bavule badi bumvua ne: mbakebe Nzambi kabayi bamupete. Badi mua kuikala bafuishibue bundu kudi miyuki ya bamfumu ba bitendelelu peshi badingibue kudi bungenda bua bamuangalaji ba evanjeliyo ba ku televizion. Bakemeshibue kudi lubombo ludi lumueneka munkatshi mua bavule ba ku bena mutumba nabu, bamue ki mbajadike tshia kuitabuja. Pabi, Mukalenge Davidi wa Izalele wa kale wakajadikila muanende Solomo ne: “Biwamukeba [Nzambi], neumu[p]ete.”—1 Kulondolola 28:9.
Nenku, mmunyi mudi Nzambi udisokolola yeye muine? Udi ne bua kutekemena tshimanyinu—bualu kampanda bukena bua pa tshibidilu buakujadikila ne: Nzambi udiku anyi? Bilondeshile dikonkoloja kampanda dimanyisha mu tshikandakanda tshia Time, bena Amerike bapite pa bantu babidi pa basatu badi bitabuja bishima. Tshiena-bualu etshi tshiakabambisha kabidi ne: “ekleziya ìdì itamba kudiunda lukasa mu Amerike mbisumbu bia bena Karisme ne bena Pentekoste biena ntendelelu udi ushindamena pa ‘bimanyinu ne malu a kukema.’”
Bidiku bushuwa bilomba “bimanyinu ne malu a kukema” bua kuitabuja Nzambi anyi? Wakatumika ne bishima mu bikondo bia kale. Tshilejilu: bualu bua dikema buakenzekela Shaula muena Tarse, eu uvua ukengesha balondi ba Muana wa Nzambi, Yezu Kristo, pavuaye mu njila umbukila ku Yeruzaleme mutangile ku Damase. Ditutakena edi dia tshishima ne Yezu mubiishibue diakafikisha ku dikudimuna dia mutshima dia Shaula. (Bienzedi 9:1-22) Ke mushindu wakalua mukengeshanganyi eu wa kale mupostolo Paulo—umue wa ku babingishi banene ba Buena-nkristo!
Kadi bishima bitu misangu yonso bituala diandamuna dilenga bu edi anyi? Ditabuja dilelela kudi Nzambi ndishindamene pa dimona bualu bua tshishima kudi muntu kampanda anyi?
[Tshimfuanyi mu dibeji 3]
Muana wa Nzambi wakakula mu tshishima ne Shaula muena Tarse. Udi ne bua kutekemena tshishima anyi?