Diambula tshikokedi mu bunsonga

MU “MATUKU makole mua kupita nawu” aa, bansonga badi bapetangana ne bifimpakaji bikole. (2 Timote 3:1) Mbinyija dituku dionso mu ngenyi mimuangalaja idi ikankamija tshiendenda, dinua dia makanya, ne mishindu mikuabu ya bikadilu bibutudi. Aba badi balonda mêyi-makulu a mu Bible badi mua kubaseka bua dibenga kuenda pamue ne mangumba, ne bamue bena nkristo badi mua kumona se: bidi mua kuikala bipepele bua kudilekelela mu malu aa.

Pabuipi ne ku ndekelu kua siekele wa muanda-mutekete K.K.B., Yelemiya wakafunda ne: “Bidi bimpe bua muntu wa mukitshi ambule tshikokedi mu tshikondo tshia bunsonga buende.” (Muadi 3:27, NW) Uvua usua kumvuija tshinyi? Bua se: kulonga mua kupita ne matetshibua patshidi muntu nsonga kudi kuambuluisha pa kulongolola muntu eu bua kuakamaye ntatu ya ku bukulumpe. Makenga, nansha mudiwu kaayi asankisha, kaena apanga kukuata bena nkristo bonso bansonga ne bakulumpe. (2 Timote 3:12) Kadi masanka a lulamatu mmapite kule ne kule disulakana kayi dionso dia tshitupa tshîpi didi ditupa ku mikenji mua kutuala.

Biwikala udi nsonga, akama mateta a ditabuja ne bululame buonso. Paudi mutetshibue bua kuditua mu tshienzedi tshibi, benga bua kutupa ku mikenji. Nansha mudibi mua kuikala bikole bua kuenza nunku mu tshikondo kampanda, mu matuku ebe a muoyo, newikale ne tunyinganyinga tukese. Yezu wakalaya ne: “Angatayi tshikokedi tshianyi . . . , ne nenupete dikankamija bua anyima yenu. Bualu tshikokedi tshianyi ntshinefuke ne bujitu buanyi mbupepele.”​—Matayo 11:29, 30, NW.

Itaba lutatu lua kuikala ne nsombelu udi mu diumvuangana ne mêyi-maludiki a mu Bible. Dienza nunku nedikupeteshe nsombelu mutambe buimpe mpindieu ne ditekemena dilelela bua matuku atshilualua. Bualu Bible udi wamba ne: “bulongolodi ebu budi bupita ne dijinga diabu kabidi, kadi eu udi wenza disua dia Nzambi udi ushala kashidi.”​—1 Yone 2:17, NW.