‘Nemvuije Nzambi tshinyemenu tshianyi’

MU “BIKONDO [ebi] bikole mua kupita nabi,” matetshibua ne bifimpakaji bidi anu bienda bivula. Tshilejilu, bululame buetu budi mua kutetshibua pa muaba wa mudimu. Bunonoke buetu budi mua kutetshibua munkatshi mua balongi netu. Ne muoyo-mutoke wetu utu misangu mivule utetshibua kudi bulongolodi ebu bunyanguke mu malu a nsombelu.​—2 Timote 3:1-5, NW.

Mufundi wa Bible Asafe pende uvua ne muoyo mu tshikondo tshivua bubi buenda bulubuluka. Bamue ba mu tshikondo tshiende bakadituta nansha mene pa tshiadi bua nsombelu wabu ukena wa buena Nzambi. “Mbavuale ditambisha bu kakanu ka mu nshingu,” ke muakafunda Asafe. “Tshikisu ke tshiabo tshilamba tshia kuvuala. Badi baseka, batumbisha bubi, bakula, batumbisha bulobo.” (Misambo 73:6, 8, MMM) Ngikadilu eu udi umvuika bu wa pa tshibidilu anyi?

Bua aba badi bajinga kuenza malu mimpe, ngikadilu wa nunku udi ubungamija bikole, utekesha mene mu mikolo. ‘Dinda too ne ku dilolo ngakakumibua,’ ke muakadilakana Asafe. ‘Buakupita kunkengesha.’ (Musambu 73:14, 16) Udi mua kumvua bia muomumue, kadi kupangi ditekemena! Asafe uvua mukumbane mua kupita ne bubi bua mu tshikondo tshiende, ne udi pebe mua kuenza bia muomumue. Kadi mmushindu kayi?

Asafe wakafika ku dijingulula ne: kulumbuluisha kuakane kua bushuwa mbualu budi kabuyi mua kupeteka muinshi mua bukokeshi bukena bupuangane bua bantu. (Musambu 146:3, 4; Nsumuinu 17:23) Nunku pamutu pa kujimija dîba diende dia mushinga mukole, makanda ende, ne mpetu yende mu diteta bua kujikija bubi buonso buvua bumunyunguluke, wakashindamena pa malanda ende ne Nzambi. Asafe wakamba ne: ‘Bidi bimpe bua meme kusemena pabuipi ne Nzambi. Nakuvuija Mukalenge Yehowa tshinyemenu tshianyi.’​—Musambu 73:28.

Lelu’eu, aba badi baditua mu ngenzelu minyanguke ya bungenda-mushinga badi misangu mivule bapeta bintu bia ku mubidi. Bavule badi nansha mene mua kudituta pa tshiadi bua kapetu kabu ku mikenji ya Nzambi ya nsombelu wa tshitembu. Kadi kabakushala ne bukole kashidi. “Bulelela, wewe udi ubateka mu miaba ya busenu,” ke muakajadika Asafe. “Wewe udi ubela [p]anshi mu dibutuka.”​—Musambu 73:18.

Eyowa, mu tshikondo tshijadika kudi Nzambi, mayele mabi, tshinyangu, ne dinyanguka, pamue ne ngenzelu mikuabu ikena ya buena Nzambi idi bena nkristo ne bua kuepuka, nebijike. Bible udi ulaya se: “Benji ba malu mabi nebabutudibue, kadi badi bindila Yehowa neba[p]iane buloba.” (Musambu 37:9) Mu tshikondo tshimuetshimue atshi, tudi mua kupunguluja mêyi a mufundi wa misambu wakamba ne: ‘Yehowa udi dibue dianyi, musoko wanyi wa ngumbu ya mvita, ne Musungidi wanyi. Udi Nzambi wanyi, dibue dianyi mundi nnyemenamu.’​—Musambu 18:2.