Bible​—Mukanda wa pa buawu

Mbaubikile ne: mukanda wa kumpala utubu basumba bikole kupita mukanda kayi wonso pa buloba bujima, ne bidi menemene nanku. Batu babala Bible ne bamuanyisha bikole kupita mukanda wonso mukuabu. Too ne mpindieu, mbatshinke bungi bua Bible ikadi miabanya (mu bujima anyi mu bitupa) bufike ku kopi miliyare inayi mu miakulu mipite pa 2 000.

Nansha nanku, tshidi tshisanguluja bikole kupita bungi bua Bible idibu basumba, ndishindika diende dia mudiye mufundisha kudi Nzambi. Mupostolo Paulo wakafunda ne: “Mufundu wonso mmuenzeja ku spiritu wa Nzambi.” (2 Timote 3:16, NW) Ebi bidi biumvuija tshinyi? Tshiambilu ‘muenzeja ku spiritu wa Nzambi’ (tshiena-Greke, the·oʹpneu·stos) ku muaku ku muaku tshidi tshiumvuija “Muela mupuya kudi Nzambi.” Muaku wa tshiena-Greke musuikakajaku, pneuʹma, udi umvuija “spiritu.” Pa nanku, dishindika didi se: spiritu munsantu wa Nzambi wakasaka bantu bikale bafundi, bienze bu se: udi ubela mupuya, mu mushindu wa se: tshipeta tshia ndekelu tshia mudimu tshivua mua kubikidibua mu bulelela buonso ne: Dîyi dia Nzambi, kadiyi dia bantu. Bushuwa, bantu bavule badi balonge Bible badi bakema bua diumvuangana diende yonso nkong, bujalame buende mu malu a sianse, bululame ne diamba bulelela bia bamufundi, ne tshidi tshitambe kuikala ne mushinga, mmilayi yende idi mikumbane​—bionso ebi mbituishe miliyo ya babadi bena meji ne: mukanda eu udi ufumina ku mpokolo mutumbuke kupita bantu.a

Kadi mmunyi muakalombola Nzambi ne dîsu dikole difunda dia Bible? Bamue badi bamba ne: uvua ubabadila Bible muaku ku muaku. Bakuabu badi bamba ne: wakenzeja ku spiritu anu ngenyi idi mu Bible, ki mmiaku to. Kadi mu bulelela, katuena mua kuimanyikila dienzeja ku spiritu edi pa ngenzelu umuepele, bualu Nzambi wakakula “ne bankambua betu mukana mua bambi bende . . . mishindu ne mishindu.” (Bena Hebreyi 1:1, Mukanda wa Mvidi Mukulu, disendamija miaku ndietu; fuanyikija ne 1 Kolinto 12:6.) Mu tshiena-bualu tshidi tshilonda, netukonkonone mishindu ivua Nzambi muakule ne bantu batue ku 40 bakafunda Bible.

[Mêyi adi kuinshi]