Diondapangana dia bishima ditshidi dienzeka anyi?

“ITABUJA Yezu ne wondapibua!” Bikuma bu etshi biakafikisha Alexandre, muena ekleziya wa Mishonyi ku ditaba ne: kuangata manga bua disama diende kuvua mua kuleja dibula ditabuja. Wakafika ku dituishibua ne: ditabuja diende nkayadi divua mua kufila luondapu lua tshishima luvuaye ukengela. Benedita, muena Katolike wa dilambu, wakalengibua bikole pakumvuaye bualu bua bishima bia luondapu mu Sanktiwere wa Aparecida do Norte, mu tshimenga tshia São Paulo, ku Brésil. Pa kutumika ne imue miaku ya majimbu ivua mamuende mukulu mumulongeshe, Benedita wakasambila Mamu Wetu wa Aparecida, “Munsantu” Antoine, ne bakuabu “bansantu” bua kupeta bukole bua kuondapa babedi.

Bidi bimueneka ne: nansha ku ndekelu kua siekele eu wa 20, bantu ba bungi batshidi bitabuja luondapu lua bishima​—kadi mbua tshinyi? Pamu’apa, bamue mbatekete mu mikolo padi ba-doktere kabayi mua kuenza bivule bua kumbusha disama, bubedi, ne makenga a banangibue babu, nangananga a bana babu. Aba badi bakenga ne masama a munanunanu badi mua kumvua ne: pa kutangila mushinga mukole wa luondapu lua buena-lelu, ki mbamone bubi bua kukeba luondapu lua ditabuja. Bamue badi bamona ku TV ekleziya kabukabu ne bantu buondapa SIDA, tunyinganyinga tukole, kansere, disama dia mpala, luendu lukole lua mashi, ne masama makuabu a bungi. Nansha bikalabu ne dieyemena mu didiamba dia nunku anyi kabayi nadi, badi mua kunyemena kudibu bu mushindu wa ndekelu bua kumvua bimpe. Bakuabu kabidi badi bitabuja ne: disama diabu ndikebesha kudi spiritu mibi badi mua kumvua ne: luondapu lua pa tshibidilu kaluena ne bukole bua kubambuluisha.

Ku lunga luseke, kudi aba badi babenga kashendende, bapisha mene, lungenyi lua bishima bia luondapu ku diambuluisha dia “bansantu” bakadi bafue anyi buondapianganyi badi ne muoyo. Bilondeshile tshikandakanda tshia Jornal da Tarde, muepeleji wa masama Dráusio Varella udi witaba ne: dianyisha luondapu lua bishima “didi difuisha ditabuja dia badi kabayi badimuke ne kabayi ne ditekemena bundu.” Udi usakidila ne: “Bavule badi mua kulekela ngondapilu wa ba-munganga udi ne mushinga anu bua bena mashimi aba, bualu badi batekemena bishima.” Ne tshibungu kampanda (The New Encyclopædia Britannica) tshidi tshiumvuija ne: “Luondapu ludi kaluyi lua pa tshibidilu ku kale luvua lusuikakaja ku miaba ya tshijila ne ku mikiya ya ntendelelu, ne dimanya dia malu a luondapu ndienzejibue bua kusuikakaja luondapu luonso lua nunku ku ngenzelu wa pa tshibidilu wa dienzejangana ku bukole muikale utumika mu nsombelu mikumbane.” Pabi, kudi bavule badi bitabuja ne: bavua bushuwa buondapibue mu tshishima. Kudibu, luondapu alu luakapatula bipeta bimpe!

Aba badi bibidilangane ne Bible mbamanye ne: Yezu Kristo wakuondapa babedi misangu ya bungi, wenza nenku ne “bukole bua Nzambi.” (Luka 9:42, 43, NW) Nenku badi mua kudikonka ne: ‘Bukole bua Nzambi butshidi butumika ne buenzeja luondapu lua bishima lelu’eu anyi?’ Bikalabi nanku, bua tshinyi dipima misangu mivule bua kuondapa ditu dipangila bua kufila bipeta bilaya? Mbua padi mubedi kayi ne ditabuja dikumbane peshi difila diende dia mfranga kadiyi divumvuke? Mbiakanyine bua muena nkristo kukeba luondapu lua tshishima padiye ukenga ne disama dikole peshi pamu’apa didi kadiyi kuondapa anyi? Ne luondapu lua bishima luvua luenzeke bushuwa lua buena luvua Yezu muenze neluenzeke kabidi anyi? Udi mua kupeta mandamuna a nkonko eyi ya mushinga mu tshiena-bualu tshidi tshilonda.