Bamanyishi ba Bukalenge badi balonda

Didipikula ku buenzeji bua ba-demon

DITUMIKA ne nyuma mibi ndikokeshe nsombelu ya miliyo ya bantu kukadi mutantshi mule. Kadi kudi mushindu wa kudipikula! Etshi ke tshiakenzekela bavule ba mu tshimenga tshia kale tshia Efeso. Bilondeshile muyuki wa mu Bible, “bena majimbu bavule ba kudibo kutuala mikanda yabo, kuyosha kumpala kua bantu buonso . . . Ke muvua muaku wa mfumu wenda utangalaka nanku.”​—Malu Menza 19:19, 20, MMM.

Lelu’eu, tshisumbu tshia bena nkristo tshidi tshidiunda muomumue. Anu muvuabi mu Efeso, munkatshi mua badi balua bena kuitabuja mudi bamue bavua batumika ne ba-demon kumpala. Bualu bumona ebu bufumina ku Zimbabwe budi tshimue tshilejilu.

Gogo (kaku mukaji) Mthupha uvua mumanya bikole bua makole ende a nyuma mibi. Bantu bavua bafuma kule bu mudi ku Zambie, Botswana ne Afrique du sud bamutantshila bua kubondapaye ne mitshi yende ya manga. Gogo Mthupha uvua kabidi ulongesha bakuabu mua kulua n’anga, anyi nganga wa kabukulu. Ne imue misangu uvua ulowangana!

Dia lumingu dikuabu mu dinda bakakumbula Gogo Mthupha kudi Bantemu ba Yehowa bavua mu mudimu wa ku nzubu ne ku nzubu. Wakasankidila bikole diyukilangana diabu pa dilaya didi mu Bible dia bulongolodi bupiabupia bua buakane, bupikula ku buenzeji bubi buonso. Wakitaba mukanda wa Udi mua kuikala ne muoyo wa kashidi pa buloba bukudimuna mparadizua ne kusanka bua kuikalaye ulonga Bible ku nzubu. Kunyima kua malonga asatu tshianana, wakatuadija kubuela mu bisangilu.

Ku diambuluisha dia dilonga diende dia Bible, Gogo Mthupha wakamanya se: makole ende a pa buawu avua afumina kudi bifukibua bia mu nyuma bibi biakatombokela bumfumu bukulu bua Yehowa. (2 Petelo 2:4; Yuda 6) Wakamanya kabidi ne: ba-demon aba mbapangadije bua kusaka muntu yonso udibu mua kupeta ku ditombokela Nzambi ne ntendelelu wende mukezuke. Bu muvuaye upetela tshiakudia anu ku dibila bifukibua bia mu nyuma bibi ebi, ntshinyi tshivuaye ne bua kuenza?

Gogo Mthupha wakaleja dijinga diende dia kudipikula ku manga ende ne ku bintu bionso bia ntendelelu wa nyuma mibi. Ebi bivua bikonga ne tshifulu tshiende tshia pa buatshi ne “nsengu ya ngombe idi yakula” ivuaye utumika nayi mu ngondapilu yende ya bu-n’anga. Gogo Mthupha wakasua kumbusha bintu bia nunku bionso bua kumonaye mua kusadila Nzambi umuepele mulelela ne udi ne muoyo, Yehowa.

Kadi, bamue ba ku balela bende bakatontolola, bualu uvua ubambuluisha ne mfranga. Bakamulomba bua abapeshe bintu ebi, pamue ne makokeshi ende a majimbu, bua batungunuke ne kudiambuluisha nau. Gogo Mthupha wakabenga.

Ku diambuluisha dia tshisumbu tshia Bantemu ba Yehowa ba mu musoko au, wakasangisha bisaka bisatu binene bia bintu bia ntendelelu wa nyuma mibi ne kubioshaye. Pakakuata bintu biende bia ntendelelu wa ba-demon kapia, Gogo Mthupha wakatua tshikemu ne: “Mona! Lusengu lualua kaluena mua kudipandisha to.”

Pashishe, ne disanka dionso, Gogo Mthupha wakaleja patoke didilambula diende kudi Yehowa ku batismo wa mu mâyi. Mmunyi mudiye upita ne nsombelu mpindieu? Ku dipanyisha bisekiseki. Eyowa, ku diambuluisha dia Dîyi dia Nzambi, muntu udi mua kudipikula ku ntendelelu wa ba-demon. Gogo Mthupha udi wamba ne: “Tshituku muanji kudiumvua ne budikadidi bu nunku to.”

[Mêyi adi kuinshi]