Kabadi kakulu ka mu Connecticut kadi kasanyika manême a babedi

Mu dia 8 Tshisanga 1996, Kabadi Kakulu ka mu Connecticut, mu États-Unis, kakasanyika bunême bua Bantemu ba Yehowa bua dibenga diela mashi. Dipangadika edi diakashipa nkoselu wa tshilumbu muenza diambedi kudi kabadi ka kumpala.

Mu Tshimungu 1994, mashi a bungi akabanga kupatuka Nelly Vega, Ntemu wa Yehowa, panyima pa dilela muanende wa kumpala. Madikolela menza bua kuimanyika dipatuka diende dia mashi akamueneka kaayi ne bua nsongo. Bu muvua nsombelu wa inabanza Vega utamba kubipa, lupitadi luakakeba bua kupeta dipangadika dia kabadi divua mua kupetesha bukenji bua kumuela mashi. Inabanza Vega ukavua mumane kutua tshiala pa mukanda mubingishi wa buondapi, uvua umvuija ne: kabamuedi mashi nansha bintu biangata mu mashi mutantshi wonso uvuaye ne bua kushala mu lupitadi, bivua biumbushila nanku lupitadi bujitu buonso bua bipeta bia dipangadika diende. Kadi, lupitadi luakakoma ne: diela mashi ku bukole divua mua kuambuluisha bua diakalenga dia muana wa katoto, uvua lupitadi luamba buende ne: uvua dijinga ne mamuende. Kabadi aka ka kumpala kavua kabidi kanyingalala bualu, pa kumbusha dijimija diende dia mashi, inabanza Vega utshivua nsongakaji, wa makanda mimpe a mubidi. Nenku, nansha muakabenga bayende wa inabanza Vega ne mumulumbuluidi wende, kabadi aka kakafila dianyisha ne bakamuela mashi.

Pashishe, bakafikisha tshilumbu etshi ku Kabadi Kakulu ka mu Connecticut. Kuine aku, ku dîyi dimue bakakosa tshilumbu ne: tshienzedi tshia lupitadi alu tshivua tshinyange manême a inabanza Vega. Nkoselu wa tshilumbu uvua ne: “Dilumbuluisha dia kabadi ka kumpala divua dienzeke munda-nkulu, mu nsombelu ya lukasalukasa menemene, ivua kayiyi mipeteshe nseke yonso ibidi mushindu wa kumvuija tshishiki bijadiki biayi.”

Nkoselu eu wa tshilumbu wa Kabadi Kakulu ka mu Connecticut udi ne mushinga wa bungi bua bantu bakuabu bakena Bantemu ba Yehowa. Donald T. Ridley, mulumbuluidi wa inabanza Vega, udi wamba ne: “Mbia mushinga bua babedi bonso badi kabayi mua kumvuangana ne mapangadika a ba-minganga babu. Nkoselu eu wa tshilumbu neakandike mpitadi bua kudiatakaja ku bukole malu a mushinga a babedi, nansha bikalawu a Nzambi nansha a patupu.”