Bamanyishi ba Bukalenge badi balonda

Bukole bukezudi bua Dîyi dia Nzambi

BADI bamba ne: bantu bavule banu ba bintu bia lulengu batu bapingana mu bibidilu biabu ebi panyima pa dipatuka mu miaba ya diakajilula. Kadi Dîyi dia Nzambi didi mua kuenza tshitu miaba eyi ipangila mua kuenza. (Ebelu 4:12) Bavule mbambuluisha kudi Dîyi dia Nzambi ne spiritu bua kutshimuna tshilele tshia dinua bintu bia lulengu ne kutumikila mubelu eu: ‘Tudilengeje ku manyanu onso a mubidi ne a nyuma, tukumbaje tshijila tshietu mu ditshina dia Nzambi.’​—2 Kolinto 7:1.

Ebi mbileja patoke kudi bualu buenzeke mu ditunga dia Myanmar. Muntu mukuabu wakaluangana ne tshilele tshia dinua bintu bia lulengu munkatshi mua bidimu bia bungi udi ulonda ne: “Ngakalua munu wa bintu bia lulengu pantshivua mu bunsonga buanyi. Misangu ya bungi ngakateta bua kulekela, kadi kakuvua mushindu. Bua kumona mua kulamata ku tshilele tshianyi tshia dinua bintu bia lulengu, ngakatuadija kuiba. Bu tshipeta, mu 1988 bakangela mu buloko munkatshi mua tshidimu tshijima.

“Panyima pa dipatuka dianyi mu buloko, ngakabanga tshiakabidi kupetangana ne balunda banyi ba kale. Katupa kîpi pashishe, meme kupingana kabidi ku dinua dia bintu bia lulengu. Njila eu wa didibutula wakasaka bena mu dîku dianyi bua kukosa nanyi malanda. Kabidi, ngikadilu wanyi wa buntomboji wakasaka bantu bavule ku dintshina mu tshinsanga, buobu pabu bakatuadija kungepuka.

“Nenku dimue edi bualu kabuyi kuepuka buakenzeka​—ngakakenga bua dinua dipitshisha dia bintu bia lulengu. Kungelabu tshiakabidi mu buloko, musangu eu bua bidimu bisatu. Nansha muvua nsombelu muikale mukole mu buloko, mu mushindu kampanda ngakenza mushindu wa kupanduka.

“Panyima pa dipingana kumbelu mfumina mu buloko, ngakalomba luse kudi dîku dianyi bua bilema bia kale. Ne bulenga buonso bakitaba bua meme kupingana, kadi musangu eu kabidi, balunda bakansaka bua kupingana mu njila yanyi ya kale.

“Ndekelu wa bionso, kaku mukaji wakalomba mpasata mukuabu wa muaba au bua mbuele mu kalasa kampanda ka Bible. Mpasata wakitaba. Kadi, kumpala kua meme kubanga kubuelamu, tatu mukaji, udi Ntemu wa Yehowa, wakamba ne: bingikala bushuwa mvua njinga bua kulonga Bible, mvua ne bua kulonga ne Bantemu.

“Ngakaya ku Nzubu wa Bukalenge ne bakandeja muntu mukuabu wakitaba bua kulonga nanyi Bible. Bantu bavule mu bateleji bakangela muoyo wa musangelu ne bua nanku meme kudiumvua muakidila bimpe.

“Mumane kutuadija kulonga Bible ne kubuela mu bisangilu bia bena nkristo, dijinga dia kusemena pabuipi ne Nzambi diakapingana pa muaba wa dijinga dikole dia bintu bia lulengu. Tshidimu tshimue pashishe ngakadiunda too ne pa kulambula muoyo wanyi kudi Yehowa Nzambi, ne ngakaleja didilambula adi ku batismo wa mu mâyi.

“Matuku mashale aa, mu diya ku nzubu ne ku nzubu, ngakapetangana ne umue wa ku binanyi ba kale banu ba bintu bia lulengu. Kavua mua kumvua dishintuluka dia dikema dimvua muenze. Ebi biakunzulula tshiibi bua kufila bumanyishi, ne mvua ne mushindu wa kuakula nende pa ditekemena dia Bukalenge.

“Ndekelu wa bionso ndi mupete tshipatshila ne diumvuija dilelela dia muoyo. Ku diambuluisha dia Nzambi ne mibelu ya mu Dîyi diende, mpindieu ndi mua kuambuluisha bantu bakuabu bua kudipikulabu ku tshilele etshi tshidi tshinyanga lungenyi tshia dinua dia bintu bia lulengu.”