Muinda bua kukulombola mu njila wa muoyo

‘YEHOWA, ndi mumanye ne: njila wa muntu kêna munda muende; muntu kêna ne bukole munda muende bua kuendesha nabu biendedi biende bimpe.’ (Yelemiya 10:23) Ku diambuluisha dia mêyi aa, muprofete Yelemiya wakaleja ne: bantu kabena mua kulongolola bimpe njila wa muoyo kakuyi diambuluisha. Mmuaba kayi utudi mua kupeta diambuluisha dia nunku? Mufundi wa misambu udi wandamuna mu disambila diende kudi Yehowa Nzambi ne: ‘Dîyi diebe didi muinda ku makasa anyi ne munya muteme mu njila wanyi.’​—Musambu 119:105.

Aba badi baditua mu dilonga dia Bible Munsantu, Dîyi dia Nzambi, ne batumikila tshidiye wamba nebikale bu muntu udi wasa luendu patshiatshia. Tshia kumpala, kêna mua kumona bikole nansha, bualu kudi mîdima. Kadi padi dîba dituadija kubanda, udi wenda umona bimpe menemene. Ndekelu wa bionso, dîba didi dikenkesha buludiludi pa mutu pende. Udi umona kantu konso mu mushindu mutoke. Tshilejilu bu etshi tshidi tshivuluija lusumuinu lua mu Bible lua se: ‘Njila wa bantu bakane udi bu dîba dia kabundubundu, didi ditema ne dikenkakenka too ne pakumbana dîba dia munda munya.’​—Nsumuinu 4:18.

Netuambe tshinyi bua aba badi babenga bulombodi bua Nzambi? Bible udi wamba ne: ‘Njila wa bantu babi udi bu mîdima mikole; kabena bamanye tshidi tshibalenduisha.’ (Nsumuinu 4:19) Eyowa, bantu babi badi bu muntu udi ulenduka mu mîdima. Nansha malu abu adi amueneka bu adi alubuluka adi mu mishindu yonso a tshitupa tshîpi, bualu ‘kakuena meji anyi dijingulula dia mianda, anyi kupunga kua mêyi, bidi mua kupita Yehowa bukole.’​—Nsumuinu 21:30.

Pa nanku, londa bulombodi bua Bible, Dîyi dia Nzambi. Biwenza nanku, neumone mêyi a mu Nsumuinu 3:5, 6 mikale malelela: ‘Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamijile njila yebe.’