Tulejayi dinanga kudi badi mu dikenga
BENA NKRISTO badi ne dienzejibua pamue ne disanka dia kuleja dinanga kudi bana babu balume ne bakaji badi mu dikenga. (1 Yone 3:17, 18) Mupostolo Paulo wakafunda ne: ‘Tuenzelayi bantu bonso bimpe, kadi tutambe kuenzela bena dîku dia bena kuitabuja bimpe.’ (Galatia 6:10) Muanetu kampanda wa balume udi musadile Yehowa munkatshi mua bidimu bitue ku makumi anayi, matuku mashale aa mmumone ne ende abidi dinanga dia buena-muntu bua bena nkristo mu disama dia mukajende ne lufu luakalonda panyima. Udi ufunda ne:
“Bu mumvua mbeja mukajanyi kumbelu mu disama diende, tshivua ne mushindu wa kuenza mudimu wa ku mubidi munkatshi mua ngondo mitue ku ibidi. Mmunyipu mumvua musulakane pakalua balunda ba mu tshisumbu kutuambuluisha ne budisuile buonso! Mapa mavule a mfranga—‘bua kufuta mfranga ya pa mutu mitula,’ ke muvua tubeji tuvua tuashindikija tuamba—mifuta bua dikula bintu bieyeka, mâyi, nzembu, ne bikuabu.
“Mbingu ibidi kumpala kua lufu lua mukajanyi, mutangidi wa tshijengu tshietu wakatukumbula ne kutukankamija. Wakatuleja mene diapozitive divua tshisumbu mua kubandila ku ndekelu kua lumingu. Tuvua ne mushindu wa kutelejila bisangilu ku telefone—pamue ne bisangilu bia mudimu wa budimi bilombola kudi mutangidi wa tshijengu. Mu tshimue tshia ku bisangilu ebi, wakambila aba bonso bavuamu bua kuelabu mukajanyi muoyo wa mu tshi-bungi. Nenku, nansha muvuaye kule mu mubidi, kavuaku muanji kudiumvua nkayende.
“Dîba dijima kadianji kupita panyima pa lufu luende, pabuipi ne bakulu bonso bavua kumbelu kuanyi. Bana betu ba balume ne ba bakaji bapite pa lukama bakatukumbula dine dituku adi. Biakudia biakamueneka ‘mu tshishima’ ku mesa bua bonso bavuapu. Tshiena mua kubanga kunulondela bua mapa onso, biambilu bia luse, mêyi a busambi, ne masambila avuabu bangenzela. Bushuwa bakankolesha! Ndekelu wa bionso mvua ne bua kulomba bana betu bua kuimanyika difila diambuluisha dia biakudia ne disukula dia mu nzubu!
“Mmuaba kayi mukuabu padibi kabiyi mu bulongolodi bua Yehowa, utudi mua kupeta mêyi a kalolo ne a luse a nunku, ditabalela, ne dinanga? Lelu’eu bantu ba bungi badi mua kubala ku minu bungi bua balunda balelela badibu nabu. Yehowa mmutubeneshe ne dîku dinene ne dialabale dia bana betu ba mu nyuma balume ne bakaji!”—Mâko 10:29, 30.