Ndibaka dia buvirgo anyi?

MU DITETA bua kupungija buvirgo bua Mariya butubu bamba ne: mbua kashidi ne disedibua diende kudi Yozefe, bazodi ne basongi ba mpingu bavule mbaleje Yozefe bu mulume ukavua mukulakaje. Bavua bela meji ne: Yozefe uvua utamba kumueneka bushuwa bu mulami wa Mariya, kavua bayende nansha. Kadi matuku adi panshi aa, Pape Jean-Paul II wakakuata ku mmuenenu mukuabu mushilangane mu muanda eu. Udi ufila lungenyi lua se: Yozefe “kavua mulume mukulakaje mu tshikondo atshi.” Kadi, “bupuangane buende bua munda, dimuma dia ngasa, buakamufikisha ku dikala mu dibaka diende ne Mariya mu disuangana dia buvirgo.”

Bu Mariya muikale ne dijinga dia kushala virgo bua kashidi, bua tshinyi wakitaba bua kumubangilabu? Pape udi wandamuna ne: “Tudi mua kuamba ne: mu tshikondo tshia dibangilangana diabu kuvua diumvuangana kampanda pankatshi pa Yozefe ne Mariya pa bidi bitangila dilongolola dia kushalaye virgo.”

Kadi, Bible udi uleja malu munga mushindu. Muyuki wa mu Matayo udi wamba bua Yozefe ne: “nanshaye kumanyangana nende too ne muakalelaye muanende wa balume.” (Matewuse 1:25, Mukanda wa Mvidi Mukulu wa bena Katolike, disendamija miaku ndietu.) Panyima pa diledibua dia Yezu, dibaka dia Yozefe ne Mariya kadiakashala dia buvirgo nansha. Tshijadiki tshimue tshia bualu ebu ntshia se: Yezu mmuleja pashishe mu muyuki wa Evanjeliyo eu muikale ne bana babu ba balume ne ba bakaji.​—Matewuse 13:55, 56, MMM.

Nenku, nansha mudi Bible wamba ne: Mariya uvua kamama pakalelaye Yezu, kakuena tshijadiki bua kuamba ne: wakashala kamama mu matuku ende onso a muoyo ne Yozefe.