Dipatula mu “mâyi male”

LUSUMUINU kampanda lua mu Bible ludi luamba ne: “Meji adi nawo muntu munda adi bu mayi male, muntu wa lungenyi ngudi mua kuasuna.” (Nsumuinu 20:5, MMM) Mu bikondo bifundilebu Bible bivua bikole bitambe bua kupeta mâyi kupita mudibi mu matunga a bungi lelu’eu. Pavua Yezu wakula ne mukaji muena Samariya, mukaji eu uvua usuna mâyi mu tshina tshia Yakoba, tshina tshia mâyi tshivua ne bondoke bu bua metre 23!​—Yone 4:5-15.

Anu bu mudi Nsumuinu 20:5 uleja, busunguluji budi bukengedibua bua kupatula meji ne nyanji idi mu buondoke bua mutshima wa muntu mbufuanangane bikole ne madikolela malomba bua kusuna mâyi mu tshina kampanda. Ebi mbilelela mu bitupa bishilangane bia nsombelu. Tshilejilu, pamu’apa udi mumanye bantu badi, munkatshi mua bidimu bia bungi, bunguije mushiki wa dimanya ne malu mamonamona. Bikala bantu aba kabayi basakibue bua kufila mibelu ku budisuile kabayi babalomba, bidi mua kukengela bua wewe kuyipatula. Pa kuleja ditabalela, kuela nkonko, ne kabidi pa kusonsola ne mbabi yonso, bidi bu se: udi upuekesha mbeketshi webe mu tshina tshile tshia meji.

Mubelu wa mu Nsumuinu 20:5 udi kabidi mua kukuata mudimu mu dîku. Pa tshibidilu, tudi tumvua bakaji bamba ne: “Bayanyi katu ungambila mudiye umvua!” Mulume udi mua kuamba ne: “Mukajanyi kêna ungakuisha nansha!” Mu nsombelu wa mushindu’eu, bidi bikengela busunguluji bua kusuna ngenyi idi miondoke mu mutshima wa muena dibaka nebe. Nkonko miela ne mbabi (Uvuaku mupete lutatu lelu anyi? Ntshinyi tshivua tshienzeke? Mmunyi mundi mua kukuambuluisha?) itu pa tshibidilu mua kufikisha bipepele ku diyukilangana dienza ne muoyo umue. Kuleja busunguluji bu nunku nekukoleshe malanda a dibaka bua diakalenga dia mulume ne mukaji.