Bitabela bivua ne dikuatshisha

NANSHA bakalenge batu ne bitabela. Asuweruse, mukokeshi wa bukole muena Perse wa mu siekele muitanu K.B.B. wakapeta tshitabela. Pamu’apa wela meji ne: uvua mupange kutabalela mudimu kampanda, wakamba bua kumubadilabu luapolo ya malu a bumfumu. Yeye kumvua ne: Môdekai, musadidi wa lulamatu, uvua mupangishishe tshifufu tshienza bua kushipa mukalenge, kadi kabavua bamufute nansha. Asuweruse wakapangadija bua kulongolola diakamue tshilema etshi. Bipeta bilenga bia bienzedi biende biakapeta tshisamba tshia Nzambi bidi bileja ne: tshitabela tshia mukalenge tshivua tshienzeja kudi Nzambi.​—Esetê 6:1-10.

Tshisumbu tshia Bantemu ba Yehowa tshidi mu tshimenga tshia Hermanus tshia ku muelelu wa mâyi mu Afrike du Sud tshivua ne kabingila ka kuvuluka tshitupa etshi tshia Bible. Benamu bavua ne tshibidilu tshia kudisangishila mu nzubu wa difutshila. Munkatshi mua bidimu bivule bavua batete bua kusumba lupangu bua kuibaka wabu Nzubu wa Bukalenge. Ndekelu wa bionso, mu 1991, bakabaleja muaba mulenga wa disumbisha kudi Kasumbu ka Balombodi ba Tshimenga.

Kadi, bamue bakabenga lungenyi lua kupanyisha Bantemu ba Yehowa muaba eu. Panyima pa lupolu lua ngondo mivule, bakamanyisha tshisumbu ne: mbapangadije bua kuindija dipanyisha ekleziya lupangu elu anu kunyima kua bidimu bisatu, ne kulekelabu lungenyi lua disumbisha muaba au. Mu Lumungulu 1993 tshisumbu kufundatshi kabidi, tshilomba bena kasumbu aka bua kutangilula dipangadika diabu. Bakapeta mukanda muikale ne tshiambilu tshimuepele bu diandamuna, wamba ne: tshikondo tshikosa tshitshivua tshitungunuka.

Mu Kasuamansense tshine tshidimu atshi, umue wa ku bena mu kasumbu ka balombodi ba tshimenga wakapeta tshitabela. Wakapitshisha dîba ubulula mabeji a luapolo ya kale ya kasumbu aka ka balombodi, bua kumona bikala amue malu alomba diatabelela. Mukanda mufunda kudi Bantemu ulomba bena mu kasumbu aka bua kutangilula dipangadika diabu wakakoka ntema yende. Nenku yeye kupangadija bua kufunda bualu abu pa dibeji dia malu a dikonkonona mu tshisangilu tshivua tshilonda. Uvua musue kuleja ne: Bantemu ba Yehowa bavua balombe muaba kumpala kua kukosabu tshikondo bua kupanyisha lupangu elu kudi ekleziya.

Mu tshikondo tshiakanyine bakapesha tshisumbu lupangu lumuelumue alu luvuabu babaleje kumpala mu 1991! Ludi ku njila munene, muaba udi bena mu tshisumbu ne basankididi mua kufika bipepele. Mbibakemu Nzubu wa Bukalenge muimpe, wakalambulabu kudi Yehowa mu dia 5 Kasuamansense 1996.

Nansha mudi tshisumbu tshinyingalala bua tshitabela tshia muena mu kasumbu ka balombodi, muanda wa se: Mukalenge Asuweruse uvua mupete pende tshitabela udi mua kusamba muntu eu. Ne tshipeta mu nsombelu yonso ibidi tshivua ne dikuatshisha. Bena mu tshisumbu tshia mu Hermanus badi bushuwa ne dianyisha kadiyi kuamba bua dikala ne wabu Nzubu wa Bukalenge, nsangilu wa ntendelelu mukezuke ne wa dilongesha dia teokrasi mu tshimenga etshi tshiende lumu tshia ku muelelu wa mâyi.​—Ebelu 10:24, 25.