Mêyi-matuma Dikumi

MUEPISKOPO wa Angleterre wa mu tshimenga tshia Gloucester wakalua kumona se: banene ba ekleziya bapite pa tshia-bibidi mu dioseze diende kabavua bamanye mua kutela ku muoyo Mêyi-matuma Dikumi, ne bantu 10 pa lukama ba kudibu kabavua bamanye muaba wa kuapeta mu Bible. Kadi bualu abu buakenzeka kukadi bidimu 450. Nsombelu ukadiku mushintuluke bituadije katshia kuine aku anyi? Nansha kakese​—bu mudibi bisokolola mu dikonkoloja kampanda dia mu mpukapuka dienza matuku mashale aa kudi bamfumu ba ekleziya Anglikane mu tshikandakanda tshia Sunday Times.

Ku bamfumu ba bitendelelu 200 bakelabu nkonko, anu bantu 34 pa lukama ba kudibu ke bakatela ku muoyo Mêyi-matuma onso Dikumi. Mu bonso badi bashale, umue uvua wela meji ne: avua ne mikandu mipite bungi, ne mukuabu wakaabenga wamba mudiwu kaayi makanyine ntatu ya nsombelu wa buena-lelu.

Udi mumanye Mêyi-matuma Dikumi peshi muaba uudi mua kuapeta anyi? Mmafunda mu Ekesode, mukanda muibidi wa mu Bible, mu mvese 17 ya kumpala ya nshapita wa 20. Bua tshinyi kubenga kuabala? Mona mushindu mupepele wa kuabulula. Anayi a kumpala adi atangila ntendelelu wa Nzambi, ditanu didi dizangika nsombelu wa mu dîku, disambombo too ne dia tshitema adi atangila malanda etu ne muntu netu, ne dia dikumi ndia pa buadi, didi ditusaka ku dikenketa mitshima yetu, ku dijoja bipatshila bietu. Tangila mu tshikoso mudi bena nkristo mua kutumikila mêyi-maludiki aa.

Dia kumpala: Ambika Mufuki wetu bulamate bukena buabanya. Dibidi: Kutumiki ne bimfuanyi mu ntendelelu webe. Disatu: Nemeka misangu yonso dîna dia Nzambi ne uditumbishe. Dinayi: Udipetele dîba dia kudifila mu malu a mu nyuma, kakuyi ditanaja. Ditanu: Bana, nemekayi baledi benu. Disambombo: Kushipianganyi. Dia muanda-mutekete: Epuka masandi. Dia muanda-mukulu: Kuibi. Dia tshitema: Amba bulelela. Dia dikumi: Lekela kualakana.

Mêyi-matuma Dikumi avua mu tshisumbu tshia mikenji mipesha Mozese. Kadi mêyi-maludiki adi munda muawu ng’a bikondo bionso. (Lomo 6:14; Kolosai 2:13, 14) Bua kabingila aka, balondi ba Yezu bavua batela anyi batuma meji ku Mêyi-matuma aa Dikumi. (Lomo 13:8-10) Mmunyipu lelu’eu muvua kuikala nsombelu wa disanka​—ne wa bukubi—​bu bantu bonso bikale banemeka ne balonda mêyi-maludiki aa menzeja ku spiritu wa Nzambi!