Mulengeja ne kakanu ka ku ditshi ka ngolo

KUTUADIJA ku bikondo bia kalekale, bilengejilu bia ngolo mbianyisha bikole bua mushinga wabi ne bulengele buabi. Pakaluaye kavula-mbedi mu Ejipitu, Yozefe wakapeta lukanu lua mu nshingu lua ngolo lua kudi Faraone. (Genese 41:42) Bakapesha Rebeka kakanu ka ku diulu ka ngolo ne nkanu ibidi ya ku maboko mienza ne ngolo, bia mushinga mutue ku dolare 1 400 lelu’eu. (Genese 24:22) Kakuyi mpata, bakangata mapa aa a mushinga mukole ne dianyisha dionso ne bakaavuala ne disanka.

Bible udi wakula bua bilengejilu bia mu tshimfuanyi bidi ne mushinga mupite kule ne kule ebi bivua Rebeka ne Yozefe bavuale. Nsumuinu 25:12 udi wamba ne: ‘Bu mudi kakanu ka or ku ditshi ne bu mudi tshilenga tshia or wa mushinga mukole, mbu mudi mubedi wa meji kudi muena ditshi didi dimuteleja.’ Padi mubedi ufila mibelu miashila pa Dîyi dia Nzambi ne kayiyi miashila pa mmuenenu wende, udi bushuwa ufila dipa dia mushinga mukole. Bua tshinyi? Bualu ndekelu wa bionso mibelu ya nunku idi ifumina kudi Yehowa nkayende. Bible udi utuambila ne: ‘Muananyi, kupetudi [“dibela,” NW] didi Yehowa ukuyisha nadi, kubela kuende kakukutondi. Bualu bua Yehowa udi ubela udiye munange, bu mudi tatu ubela muanende mulume udi umusankisha.’ (Nsumuinu 3:11, 12) Padi muteleji witaba mibelu eyi ne bupuekele buonso ne uyitumikila, udi anu bu udi udilengeja ne kakanu ka ku ditshi ka ngolo. Bidi anu bu mudi lusumuinu lua mu Bible luenzeja ku spiritu luamba ne: “Muntu mupete meji, muikale kabidi ne lungenyi, ngwa diakalenga. [Mbimpe] kupeta meji pa mutu pa kupeta biuma, tshiuma tshia kudi meji ntshipite mpawungi ku mushinga.”​—Nsumuinu 3:13, 14, MMM.