“Nuvuije bantu ba mu matunga onso bayidi”

“NUNKU, ndayi ne nuvuije bantu ba mu matunga onso bayidi, nubatambuishe mu dîna dia Tatu ne dia Muana ne dia spiritu munsantu.” Ke mudi Traduction du monde nouveau ukudimuna dîyi-dituma dia Yezu didi mu Matayo 28:19. Kadi, bantu mbatobolole ngandamuinu eu. Tshilejilu, kabeji kakuabu ka malu a Nzambi kadi kamba ne: “Nkudimuinu umuepele muanyisha kudi mifundu ya tshiena-Greke udi ne: ‘Nuvuije bisamba bionso bayidi!’” Bualu ebu mbulelela anyi?

Ngandamuinu eu, “Nuvuije bisamba bionso bayidi,” udi umueneka mu nkudimuinu mivule ya Bible ne ndikudimuna dia ku muaku ku muaku dia tshiena-Greke. Nenku, ntshishimikidi kayi tshidiku bua kubala ne: “Nuvuije bantu ba mu matunga onso bayidi, nubatambuishe”? Mmiaku idi mituangane. Tshiambilu tshia ne: “nubatambuishe” tshidi tshileja patoke bantu, ki mbisamba nansha. Hans Bruns, mushikuluji wa bena Allemagne udi wamba ne: “[Muaku] ‘-ba-’ kawena uleja bisamba (tshiena-Greke tshidi tshifila dishilangana dia patoke), kadi udi uleja bantu ba mu bisamba ebi.”

Kabidi, tudi ne bua kutangila mushindu wakakumbajabu dîyi-dituma edi dia Yezu. Bua bidi bitangila mudimu wa Paulo ne Bânaba ku Dêbe, tshimenga kampanda tshia mu Azi Minere, tudi tubala ne: ‘Pakambilabu bena musoko au bualu bua lumu luimpe, pakavuijabu bantu ba bungi bayidi, bakapingana ku Luseta ne ku Ikonio ne ku Antiokia.’ (Bienzedi 14:21) Bambisha ne: Paulo ne Bânaba bakavuija bayidi, ki ntshimenga tshia Dêbe, kadi bamue ba ku bantu ba mu Dêbe.

Bia muomumue, bua tshikondo etshi tshia ku nshikidilu, mukanda wa Buakabuluibua wakadianjila kumanyisha, ki nne: matunga majima avua ne bua kusadila Nzambi, kadi ne: “musumba munene . . . wa mu matunga onso ne bisa bionso ne bisamba bionso ne miakulu yonso” ke uvua ne bua kuenza nunku. (Buakabuluibua 7:9, NW) Nenku, Traduction du monde nouveau mmubinge bu nkudimuinu wa kueyemena wa ‘Mufundu wonso muenzeja ku spiritu wa Nzambi.’​—2 Timote 3:16, NW.