Diandamuna didi disonsola

TSHIKANDAKANDA tshia Catholic Herald, tshia Ekleziya Katolike wa bena Roma wa mu Grande-Bretagne, tshiakapatula matuku mashale aa mukanda udi ulonda eu wa kudi mubadi kampanda wa mu Pays de Galles: “Bumue butuku, Bantemu ba Yehowa babidi bakalua kuanyi. Meme kufika ku dibambila ne: Ekleziya Katolike ke uvua mukube buinenke bua Tshiovo Tshipiatshipia tshivuabu batela. Bualu buakankemesha, umue wa kudibu wakitaba. Wakamba ne: ‘Eyowa, nudi nutshikuba kadi kanuena nutshilonda. Yezu wakamba ne: “nunangangane bu mundi mununange meme,” kadi nuenu nudi nushipangana. Mu mvita mishale, bena Katolike bakashipa bena Katolike, kadi Ntemu wa Yehowa nansha umue kakashipa Ntemu [nende].’ Mvua ne bua kuitaba bualu ebu. Mmunyi mutudi mua kusambila bua kuikala mu buobumue ne ‘bana betu badi batapuluke’ netu padiku kakuyi buobumue bua bushuwa munkatshi muetu tuetu bine? Katuena ne bua kuanji kulongolola bualu ebu bubiabubi anyi?”​—Yowanese 15:12, MMM.

Mvita ibidi ya buloba bujima ya mu siekele eu wa 20 yakatuadijila yonso mu Bukua-buena-nkristo ne yakashipesha bantu batue ku miliyo 50 anyi 60. Kadi, tudi mua kuamba mu bulelela buonso ne: Bantemu ba Yehowa kabakabuela mu mvita ayi nansha, ne kabena babuelakana mu mvita kayi yonso idiku matuku aa. Mmunyi mudibi mua kuenzeka? Kumanya malu makuabu adi atangila bisuikidi bikole bia dinanga ne buobumue bia bena nkristo bidi nabi Bantemu ba Yehowa bapite pa miliyo itanu pa buloba bujima nekuikale ne dikuatshisha kuudi.​—Fuanyikija ne Yeshaya 2:4.

[Mêyi a dianyisha bua tshimfuanyi mu dibeji 32]

U.S. National Archives photo