Didi disamuna Mufuki wadi mu tshimuma

MUBUELELU wa dîba utu ukemesha mutuwu. Kadi mushindu udi dîba dienda dipuekela kunyima kua mukuna eu wa pa buawu mu Alpes Apennines wa Toscane, mu Italie, utu bushuwa wa pa buawu.

Patudi tudimuenena pa bule, dîba didi dimueneka bu didi dibuela mu mukuna pamutu pa kupuekela kunyima kuawu. Bua tshinyi? Bualu ku mutu kua mukuna eu nkuenze tshijengu tshia ku tshifukilu tshidi tshimueneka bu tshiondola. Bushuwa, lusongo elu lua buloba ndupete dîna dia se: Monte Forato​—Mukuna Mutubula. Bua dinyunguluka dia buloba ku dîba, misangu ibidi patupu ku tshidimu tshionso bantu badi batangidila mu disoso edi badi mua kumona dîba dimueneka bu didi dibuela mu Monte Forato.

Anu bu bikuabu bimanyinu bia bufuki, diulu didi kadiyi ne muoyo didi disamuna Mufuki wadi. Mmushindu kayi? Mushindu wa muomumue udi tshimfuanyi tshilenga tshizola tshitumbishisha muzodi wakatshienza. Bushuwa, mabulunge a muulu adi akula bua bukole, meji ne bunême bia Yehowa. Anu mudi mufundi wa misambu ubileja: ‘diulu didi diamba butumbi bua Nzambi; bia mu diulu bibaluluke bidi bimuenesha midimu ya bianza biende.’ (Musambu 19:1; 69:34) Bu mudi dîba ne makuabu mabulunge adi kaayi ne muoyo bisamuna Mufuki wabi, tudi ne bua kutamba kuenza nenku!​—Musambu 148:1, 3, 12, 13.