Bamanyishi ba Bukalenge badi balonda
Ditantamana didi difikisha ku dibenesha dia Nzambi mu Malawi
YOZEFE uvua musadidi muena lulamatu wa Yehowa. (Ebelu 11:22) Uvua kabidi muntu wa ditantamana dia pa buadi. Nansha muvuaye mutungila tshitungu kudi bana babu, mupanyisha bu mupika misangu ibidi, ne pashishe muela mu buloko bua mabanda a dishima, Yozefe kakazengela nansha. Kadi, ne lutulu luonso wakatantamena bidimu bivule bia dikenga, muindile dibenesha dia kudi Yehowa ne budipuekeshi buonso.—Genese 37:23-28, 36; 39:11-20.
Bia muomumue lelu’eu, Bantemu ba Yehowa mu Malawi mbindile dibenesha dia Nzambi ne lutulu luonso. Munkatshi mua bidimu 26, Bantemu bena nkristo aba bakatantamena dikandika dia mbulamatadi, buluishi bua katshi ku dînu ne bikisu bivule. Kadi ditantamana diabu diakakuama mamuma mimpe!
Pakabudika dikengeshibua mu Malawi ku ndekelu kua 1967, muvua bamanyishi ba Bukalenge batue ku 18 000. Ela meji bua disanka dia Bantemu pakumvuabu ne: tshidimu tshia mudimu tshia 1997 tshiakatuadija ne bungi bubandile bupiabupia bua bamanyishi 38 393—bungi bupite misangu ibidi bua ku mbangilu kua dikandika! Kusakidila apu, bungi bua babuedi ba mu Mpuilu ya Distrike 13 mienza mu Malawi ya “Batuadi ba mukenji wa ditalala dia Nzambi” buakapita pa 117 000. Bulelela, Yehowa mmubeneshe ditabuja ne ditantamana diabu.
Tshilejilu tshia dibenesha edi mbualu buenzekele muana wa balume wa bidimu 14, dîna diende Machaka. Pakitabaye bua kulonga Bible ne Bantemu ba Yehowa, baledi bende bakalubakana bikole. Bakamuambila ne: “Biwasua bua kulua Ntemu, udi ne bua kumbuka kumbelu.” Kadi mukanu eu kawakamutekesha mu mikolo bua kubenga kutungunuka ne dilonga diende. Bu tshipeta, baledi ba Machaka bakanyenga bilamba biende bionso. Bana betu bakandamuna pa kumusumbila bikuabu. Pakamanya baledi ba Machaka bualu ebu, bakamuambila ne: “Bikala Bantemu mua kuambula bujitu buebe, udi ne bua kumbuka kumbelu ne kuya kusomba nabu.” Panyima pa mumane kukonkonona muanda eu ne ntema, Machaka wakumbuka kumbelu, ne dîku kampanda dia Bantemu dia mu tshisumbu tshia muaba au diakamuangata.
Biakatonda bikole baledi ba Machaka mu mushindu wa se: bakapangadija bua kumbuka muaba au bua kuepuka dipetangana dionso ne Bantemu. Bushuwa, bualu ebu buakabungamija Machaka, kadi wakapeta busambi buvule pavua bana betu bakonkonone nende Musambu 27:10, udi wamba ne: “Nansha biandekela tatu wanyi ne mamu wanyi, Yehowa neangambule.”
Ndekelu wa bionso, baledi ba Machaka bakatuyisha mmuenenu wabu, ne wakapangadija bua kupingana kumbelu. Mbimueneke ne: dipangadika dia muanabu wa balume dia kusadila Yehowa diakabakemesha bikole, bualu buobu pabu bakajinga dilonga dia Bible ne Bantemu ba Yehowa! Bakabuela kabidi mu matuku onso asatu a Mpuilu wa Distrike wa “Batuadi ba mukenji wa ditalala dia Nzambi,” panyima pa Mpuilu eu bavua basakibue bua kuamba ne: “Bulelela, ebu ke bulongolodi bua Nzambi.”
Eyowa, buluishi budi mua kuikala diteta, kadi batuadi ba mukenji ba Nzambi bena bulamatshi kabena bapungila. Ne dikima dionso badi baya kumpala, bamanye se: ‘Ntatu idi yenzeja ditantamana, ne ditantamana didi dienzeja dijadikibua.’ (Lomo 5:3, 4) Bantemu ba Yehowa mu Malawi badi mua kujadika bulelela ne: ditantamana didi difikisha ku dibenesha dia Nzambi.