Nzambi neabutule bulongolodi ebu anyi?
BILONDESHILE Pape Jean-Paul II, bantu badi mua kutekemena matuku atshilualua ne dishindika. Wakaleja ne: mu malu a kale, “bantu bavua batungunuke ne dienza mpekatu, pamu’apa mitambe bunene kupita idibu bumvuije ya kumpala kua mvula munene.” Nansha biobi nanku, pape wakumvuija ne: “Mu mêyi a tshipungidi tshiakenza Nzambi ne Nowa, tudi tujingulula ne: mpindieu kakuena mpekatu udi mua kufikisha Nzambi ku dibutula bukua panu [bulongolodi ebu] buvuaye mufuke yeye nkayende.”
Bidiku bilelela bua se: Nzambi kakubutula bukua panu [bulongolodi ebu] anyi? Bible udi wamba ne: kunyima kua Mvula wa kabutu Nzambi wakambila Nowa ne: ‘Nenjadike nenu tshipungidi tshianyi ne: Tshiena njimija bintu bionso ne mâyi kabidi nansha; mâyi kaena avulangana kabidi bua kujimijawu buloba.’ (Genese 9:11) Pape udi wamba ne: bua mêyi aa, Nzambi “wakadielela mukenji bua kukuba [buloba] ku kabutu.”
Bible udi utokesha bualu ebu ne: Mufuki kakuanyisha bua dibulunge dietu edi dibutuke. Udi wamba ne: “Buloba budi bushala kashidi.” (Ntoyi 1:4, MMM) Kadi kudi malu a bungi a dilongela ku Mvula wa kabutu—malu avua pape kayi mumvuije.
Yezu wakamba ne: nsombelu wikala pa buloba mu tshikondo tshia dikalaku diende ditshivua dilua uvua ne bua kuikala ‘bu muakadi pa matuku a Nowa,’ pavua bantu ‘kabayi bamanye bualu too ne pakalua mvula ya bungi kubabutula.’ (Matayo 24:37-39) Bia muomumue, mupostolo Petelo wakafunda ne: anu muvua ‘bulongolodi bua tshikondo atshi bupete kabutu pakabuinabu mu mâyi,’ nenku kabidi “dituku dia dilumbuluisha ne dia kabutu ka bantu badi kabayi batshinyi ba Nzambi” didi diamba kudituta pa bulongolodi bua lelu.—2 Petelo 3:5-7, NW.
Yezu ne Petelo bavua bapue muoyo tshipungidi tshia Nzambi tshienza ne Nowa anyi? Nansha kakese! Anu muvuaye muambe mu tshipungidi tshienza ne Nowa, Nzambi kakutumika ne mâyi a mvula bua kutuisha ndongoluelu eu mubi wa malu ku ndekelu. Kadi, neatumike ne bukole bua “Mukalenge wa bakalenge ne Mfumu wa bamfumu,” Yezu Kristo. (Buakabuluibua 19:11-21, NW) Pa nanku, bilondeshile Bible, kabakubutula buloba, kadi kakuyi mpata “bulongolodi” ebu bua bantu babi nebutue ku ndekelu. (Nsumuinu 2:21, 22; Buakabuluibua 11:18) Pashishe, “bantu bakane neba[p]iane buloba, nebashikamemu tshiendelele.”—Musambu 37:29.