Bukezuke bua bena nkristo​—Budi bumvuija tshinyi?

BENA NKRISTO kabena muinshi mua Mikenji ne malu-malomba ayi a didikezula, nansha muvua Mikenji eyi ne bilele biayi bitshikale bitumika mu matuku avua Yezu pa buloba. (Yone 11:55) Mikenji ivua “ne mindidimbi ya bintu bimpe bilualua”; ‘mubidi wabi udi Kristo.’ (Ebelu 10:1; Kolosai 2:17, MML) Pa nanku, Paulo wakafunda bua malu aa a didilengeja ne: “Eyowa, pabuipi ne bintu bionso mbikezula ne mashi bilondeshile Mikenji [Mozese wakasanshila mashi pa mukanda, bantu, ntenta ne pa malongo ne mpanza], anu biapueka mashi ke dibuikidila kushisha kuenzeka. Pa nanku bivua bikengela ne: bimfuanyi bia tshilejilu bia bintu bia mu diulu bikale bikezula mushindu’eu.” “Bualu bikala mashi a mbuji ne a ngombe ne butu bua kana ka ngombe bisanshila pa aba badi bikale banyanguke bisantuisha too ne ku bukezuke bua mubidi, mmunyi muatamba mashi a Kristo, wakadilambula kudi Nzambi kayi kalema ku butuangaji bua spiritu wa tshiendelele, kukezula tuondo tuetu tua muoyo ku midimu mifue bua tumone mua kuenzela Nzambi wa muoyo mudimu wa tshijila?”—Ebelu 9:19-23, 13, 14, NW.

Nenku, mashi a Mukalenge Yezu Kristo ke adi akezula bena nkristo ku mpekatu ne dipanga buakane dionso. (1 Yone 1:7, 9) Kristo “wakananga tshisumbu ne kudifila bua bualu buatshi, bua amone mua kutshisantuisha, utshikezula ne diowesha dia mâyi ku diambuluisha dia dîyi” bua tshikale katshiyi katoba, tshinsantu, ne katshiyi kalema, “tshisamba tshiende nkayende, tshikale ne lukunukunu bua midimu milenga.” (Efeso 5:25-27; Tito 2:14, NW) Pa nanku, muntu yonso muena mu tshisumbu etshi tshia Buena-nkristo kêna ne bua kuikala ‘ne tshipua muoyo bua dilengeja dia ku malu mabi ende a diambedi,’ kadi udi ne bua kutungunuka ne kuleja mamuma a spiritu wa Nzambi (2 Petelo 1:5-9), muvuluke ne: ‘ditamba dionso didi dikuama mamuma yeye [Nzambi] neadilengeje bua kukuamadi mamuma makuabu.’​—Yone 15:2, 3.

Pa nanku, bena nkristo badi ne bua kulama bukezuke butumbuke bua ku mubidi, mu tshikadilu ne mu nyuma, kudikuba ku “manyanu onso a mubidi ne a nyuma.” (2 Kolinto 7:1) Mu ditangila tshiakamba Yezu bua se: ki ‘ntshidi tshibuela munda mua muntu tshidi tshimunyanga; kadi malu adi alopoka munda muende ng’adi amubipisha,’ bantu aba badi bapetela masanka ku mashi makezudi a Kristo badi batamba kuzangika bukezuke bua mu nyuma. Badi ne “mutshima mukezuke” ne “kuondo ka muoyo kakezuke” kumpala kua Nzambi. (Mâko 7:15; 1 Timote 1:5, NW; 3:9; 2 Timote 1:3) Bua bantu bu aba badi ne kuondo ka muoyo kakezuke, “bintu bionso mbikezuke,” kadi bua bantu bapange lulamatu badi ne kuondo ka muoyo kanyanguke, “tshintu nansha tshimue ki ntshikezuke.” (Tito 1:15, NW) Aba badi basue kushala bakezuke ne bapeluke mu mutshima badi bateleja mubelu wa Yeshaya 52:11, udi wamba ne: ‘Kanulengi tshintu tshidi tshibipa! Nudilengeje, nuenu badi batuala malonga a Yehowa.’ (Musambu 24:4; Matayo 5:8) Padibu benza nenku, “bianza” biabu mbikezula mu ngumvuilu wa tshimfuanyi (Yakobo 4:8), ne Nzambi udi ubangata bu bantu bakezuke.​—2 Samuele 22:27; Musambu 18:26; tangila kabidi Danyele 11:35; 12:10.

Nansha muvuaye katshiyi muinshi mua Mikenji, umue musangu mupostolo Paulo wakatumikila malu-malomba a Mikenji pa kudikezula ku ntempelo bilondeshile bilele. Bualu ebu buvua bubi kudiye anyi? Paulo kakaluisha Mikenji anyi tunungu tuayi; wakaleja patoke ne: diyitumikila kadivua bualu buvua Nzambi ulomba bena nkristo. Muaba uvua tunungu tuayi katuyi tutupa ku malelela mapiamapia a bena nkristo, kakuvua kabingila bua kubenga kuenza tshivua Nzambi muambe mu Mikenji. Paulo wakenza bualu abu bua kamonyi mua kupangisha patupu bena Yuda diteleja lumu luimpe lua Yezu Kristo. (Bienzedi 21:24, 26; 1 Kolinto 9:20) Bia muomumue, wakabela kabidi ne: biakudia nkayabi bidi mua kuikala bikezuke, kadi bikala dibidia diende dilenduisha muanabu, nenku neadikande ku dibidia. (Lomo 14:14, 15, 20, 21; 1 Kolinto 8:13) Mu bionso ebi, Paulo wakaleja diditatshisha dikole bua lupandu lua bakuabu ne wakenza tshintu tshionso tshivua mu bukokeshi buende bua kukumbaja bualu ebu. Pa nanku wakamba ne: “Ndi mbingishibua ku mashi a bantu bonso.”​—Bienzedi 20:26; 18:6.