“Katshia ku buana udi mumanye”

BILONDESHILE makebulula a bena sianse a matuku mashale aa, kuakuisha bana kudi mu mushindu muondoke ne buenzeji pa dikola dia buongo buabu, kushindika bukokeshi buabu bua diela meji, bua dinana lungenyi ne bua dijandula nshinga. Bidi nunku nangananga mu tshidimu tshia kumpala tshia matuku a muoyo a muana mutekete. Tshikandakanda kampanda (International Herald Tribune) tshidi tshiamba ne: bamue bakebuludi badi mpindieu bitaba ne: “bungi bua mêyi adi muana mutekete umvua dituku dionso ntshimanyinu tshia pa buatshi tshidi tshitambe kuikala ne mushinga tshia meji aluaye kupeta pashishe, tshia dipatula bipeta bimpe mu kalasa ne tshia dimanya-kuenza dia mu nsombelu.”

Kadi, mêyi mamba mukana adi ne bua kufuma kudi muntu. Bidi bimueneka ne: televizion anyi tshisanji kabiena mua kupingana pa muaba wa muntu.

Mushikuluji kampanda wa malu a ndongoluelu wa buongo ne mifungu wa ku Université wa Washington mu tshimenga tshia Seattle, ku États-Unis, wakamba ne: “Mpindieu tudi bamanye se: dilamakana dia mijilu ya buongo didi dienzeka kumpala menemene mu matuku a muoyo ne se: buongo bua muana mutekete mbuindile bushuwa mamanya bua kujadika mudi dilamakana edi dienzeka. Too ne matuku mashale aa katuvua bajingulule mudi dilamakana edi dituadija kumpala kua dîba. Tshilejilu, bana batekete mbamanye mêyi a muakulu wabu wa ku tshilelelu batshikale ne ngondo isambombo.”

Makebulula adi ashisha mmuenenu mutangalake wa se: bana batekete nebalubuluke mu lungenyi anu bikalabu babaleje dinanga dia bungi. Adi kabidi azangika mushinga udi nawu baledi mu dilubuluka dia muana.

Bualu ebu budi butuvuluija mêyi adi mu mukanda mufundisha ku spiritu uvua mupostolo Paulo mutumine Timote a se: “Katshia ku buana udi mumanye mifundu minsantu, idi mua kukuvuija muena meji bua lupandu.” Bidi pamu’apa se: mifundu minsantu, miambila muana mutekete Timote kudi mamuende ne kakuende-mukaji bena kuitabuja, ivua ne mushinga wa nshindamenu mu dilubuluka diende bu musadidi wa pa buende wa Nzambi.​—2 Timote 1:5; 3:15, NW.