Bua tshinyi kubenga kuikala nabu?

NDJAUKUA ULIMBA udi ne bidimu 73, ne tshidimu tshishale wakenza luendu lua kilometre bu 450. Wakenda mutantshi wonso au, ne wakamuangata matuku 16.

Mukulakaje eu wakenza luendu luende lule bua kubuela mu umue wa ku mpungilu ya ku tshidimu ya Bantemu ba Yehowa. Panyima pa mpungilu, muikale ne disanka divule ne mukolesha mu nyuma, wakenza kabidi luendu mutangile kuende​—matuku makuabu 16. Madikolela aa avua makanyine anyi? Bushuwa menemene! Ndjaukua Ulimba mmuenze luendu elu lua ku tshidimu tshionso munkatshi mua bungi kampanda bua bidimu.

Mulume eu wa mu Afrike uvua umue wa ku bantu bapite pa miliyo 15 ba mu matunga mapite pa 230 bakabuela mu mpungilu ya Bantemu ba Yehowa tshidimu tshishale. Bushuwa, bantu bavule kabavua ne bua kuenda munkatshi mua matuku a bungi bua kufika muaba wa mpungilu. Ba bungi bakalua ku vuatire, bise, kawulu anyi ku ndeke. Uvua pebe munkatshi muabu anyi?

Mu 1998, nebenze kabidi mpungilu pa buloba bujima, nangananga mu ngondo ya muvu wa été (anyi mu mushipu). Bikalaye ne makanda a mubidi, pamu’apa Ndjaukua Ulimba neenze luendu lule lua muomumue bua kubuelamu. Yeye ne bakuabu miliyo mivule nebateleje ndongamu udi ukuatshisha, ukolesha ditabuja ne ufila makanda. Bua bonso badi babuelamu, mpungilu eu neikale muanda munene wa mu tshidimu. Wewe pebe udi mubikidibue ne musangelu wonso bua kubuelamu. Bantemu ba Yehowa ba mu tshitupa tshienu nebikale ne disanka dia kukuambila muaba wenzekela mpungilu pabuipi nebe.