Ngakuilu webe utu utapa anyi utu wondopa?

MU BIKONDO ebi bikole, kabiena bitamba kukemesha bua mudi bantu ba bungi bikale ne ‘mitshima itamba kunyingalala’ ne ‘mitshima ya majiya.’ (Musambu 34:18) Nenku, bilondeshile mêyi a mupostolo Paulo, kudi dikengela dia munanunanu bua ‘kuakula ne anyima mibungame ne busambi buonso’ ne ‘kukuatshisha batekete.’ (1 Tesalonike 5:14, NW) Kadi bidi munyi bikala muinetu mutuenzele tshilema anyi muenze bualu kampanda bubi menemene? Mu nsombelu bu eu, tudi mua kudiumvua bikale ne kabingila bua kukanyina muntu eu bikole. Nansha nanku, mbimpe kuikala ne budimu. Mubelu, nansha wowu muimpe, udi mua kunyingalaja bikalawu mufila mu mushindu mubi. Nsumuinu 12:18 (MMM) udi wamba ne: “Muena biakulakula udi utapa bantu ne meyi bu mudi muele wa nkanza.”

Pa nanku, patudi basue kufila didimuija anyi kujikija dipanga kumvuangana, mbia mushinga mukole bua kuvuluka tshitupa tshibidi tshia Nsumuinu 12:18: “Meyi a bantu ba meji adi [“luondapu,” NW].” Misangu yonso wikale udikonka ne: ‘Bu meme dijinga ne didimuija, mmunyi mumvua mua kusua bua kudimpeshabu?’ Bavule ba kutudi badi batamba kuanyisha dibakankamika pamutu pa dibatobolola. Nenku ikala muena kalolo mu dielangana ka-lumbandi. Ebi nebisake misangu mivule muenji wa tshilema bua kudilongolola, ne pamu’apa neatambe kuikala ne dianyisha bua diambuluisha dionso dimupesha.

Mmunyipu mudibi misangu yonso bia mushinga mukole bua kuleja bupole-malu mu mêyi etu! Mêyi adi ondopa neikale pamu’apa mua kushiya muteleji umvua anu bu muakumvua mufundi wa misambu, wakafunda ne: ‘Muntu muakane antute, muanda eu newikale luse kundi; ambele biende, kubela kuende nekuikale bu manyi pa mutu panyi, mutu wanyi kaubengi manyi au.’​—Musambu 141:5.