“Nulamate bikole ku tshinudi natshi”

Kasumbu ka Bantemu kavua kayisha mu tshimue tshia ku bidiila bitue ku 30 bidi bienza bidiila bia Cyclades bia ditunga dia Grèce. Pavua babidi ba kudibu bayisha ku nzubu ne ku nzubu mu musesu kampanda, bakasambakena ne mpulushi kansanga e kubambilaye bua bamulonde ku biro bia bampulushi. Katupa kakese panyima pa bamane kufika kuine aku, telefone wakadila. Uvua nsaserdose wa mu musoko au. Wakamba ne: “Ndi mumvue ne: Bantemu ba Yehowa badi mu musoko emu.” Mpulushi eu kuandamuna ne: “Eyowa, ndi ne babidi muaba eu.” Nsaserdose kuambaye ne: “Ndi mfika ku biro aku mu katupa emu.” Ku ngakuilu wabu, bana betu aba bakumvua ndambu wa buôwa.

Kadi ne tshifikidi, nsaserdose eu wakafukisha mimuemue, kubanyukula tshianza, ne kusomba mu nkuasa ku luseke lua mpulushi. Pakabangisha diyuki, mpulushi eu wakatuadija kujula milandu pavua eku nsaserdose mushale ne nkatshinkatshi ne kanemu. Wakambila mpulushi bua kapepeji Bantemu to, ne wakasakidila ne: “Badi mua kuandamuna lukonko luonso bualu badi bapeta dilongesha mu Kalasa ka Mudimu wa Teokrasi. Bidi mua kuikala bitamba kupepela bua kukulula buloba kupita kushintulula ditabuja dia Ntemu wa Yehowa.”

Pavuabu bayisha mu dinda diakalonda, bana betu aba bakasambakena kabidi ne nsaserdose eu ne kumuebejabu ne: “Bua tshinyi uvua mutambe kuikala muena bulunda kutudi mu diyuki dia ku biro bia bampulushi?” Nsaserdose wakabambila ne: uvua mumanyangane ne Bantemu bavule mu Syros ne se: uvua muikale ubala bibejibeji bia Tshibumba tshia Nsentedi ne Réveillez-vous! bidimu bivule. Bushuwa, misangu ya bungi uvua wangata tshibejibeji tshia Tshibumba tshia Nsentedi utshisokoka mu tshilaminyi tshia mabeji (farde), ne utumika natshi bua kuenza muyuki wende mu ekleziya. Wakamba ne: “Tshiena ngela meji ne: muoyo uvua mua kuikala ne mushinga bu meme tshiyi mbala mikanda yenu to. Ke tshidi tshimpesha ditekemena.”

Pashishe, nsaserdose eu kuambilaye Bantemu ne: “Ndi ne bua kunuambila bualu bumue. Nulamate bikole ku tshinudi natshi. Kanuenji tshilema bua kutshilekela nansha. Bualu bundi nnuambila mpindieu mmuyuki mutambe buimpe untu tshiyi muanji kuenza, ne tshiena ngamba bualu ebu mukana patupu to; kadi ndi mbuamba ne muoyo wanyi mujima.”