Bimanyinu bia mu njila udi ufikisha ku muoyo

BIWIKALA wenza luendu mu kajila anyi mu njila uudi kuyi mumanye, newangate bimanyinu bu tshipumbishi anyi? Kabiena nanku to! Bushuwa neubimone bu tshintu tshidi tshikuambuluisha bua kubenga kupambuka mu njila udi ufikisha kuudi uya.

Kadi netuambe tshinyi bua kuenza luendu mu njila udi ufikisha ku muoyo? Tudi mua kuendelamu bimpe kakuyi bimanyinu anyi? Muprofete wa kale wa Nzambi wakitaba mikalu ya bantu mu muanda eu. Wakamba ne: “O Mukalenge, ndi mumanye ne: njila ya muntu kayena ku didisunguila diende; ne muntu kêna mua kupangadija tshidi nsombelu wende.”​—Yelemiya 10:23, The New English Bible.

Nenku nkuepi kutudi mua kupeta bulombodi budi bukengedibua? Mpokolo wa kueyemena wa buludiki ebu m’Mufuki wa muntu, ne mu Bible ke mudi bimanyinu bia mu tshimfuanyi. Yehowa udi wamba ku diambuluisha dia Dîyi diende ne: ‘Pawakeba kusesuka ku tshianza tshia balume, anyi ku tshianza tshia bakaji, matshi ebe neumvue dîyi difume kunyima kuebe, diamba ne: Njila [nyeyewu], endelamu.’​—Yeshaya 30:21.

Eyowa, Dîyi dia Nzambi didi difila buludiki bua kueyemena mu bitupa bionso bia nsombelu wetu. (Yeshaya 48:17; 2 Timote 3:16, 17) Kadi bia dibungama, bantu ba bungi badi bendela mu njila udi mutangile ku muoyo badilamune ku bulombodi bua Nzambi. (Matayo 7:13) Nansha nanku, bimanyinu ebi mbijadika kashendende ne kabiena binyunga to! Neubitabalele paudi wenda mu njila udi ufikisha ku muoyo anyi?