‘Bale bu mutshi wa sedre wa ku Lebanone’

PA MIKUNA milengele ya ku Lebanone padi patoloka mitshi idi mimanyike bu Arz Ar-rab, mmumue ne: “Sedre ya Mukalenge.” Mitshi eyi minene ya mabeji a mâyi a matamba, ivua mibuikile mikuna eyi bikondo bia kale, mbakule bualu buayi mu Bible misangu mitue ku 70​—misangu mivule kupita mitshi mikuabu yonso.

Bua kumvuija bunene bua mitshi ya sedre ya ku Lebanone, Mifundu idi yenza mudimu ne miaku ‘milengele’ ne “muakane.” (Musambu wa Solomo 5:15; Yehezekele 17:23) Bunene bua mutshi wa sedre ne bukole buawu mbiumanyishe kudi bantu katshia ku kale bua diasa nawu nzubu ne dienza nawu mazuwa ne bintu bikuabu. Mupuya wa mutshi eu ne dikala diawu dikunzubile mbilenga bitambe, ne budimbua buawu budi buenza ne: bikale bikole bua kubolawu ne bua kudikawu kudi tuishi. Mitshi eyi mmile bikole ne minene, itu ifika bule bua metre mapite pa 37 ne bunene bua metre mapite pa 12, ne itu ne miji mikole itu ibuela mu buloba bikole. Kabiena bikemesha mudi bamue bamanyi ba malu a metu ba lelu bayibikile bu “butumbi budi ku mutu kua bukua-mitshi”!

Yehezekele, mufundi wa Bible, wakafuanyikija mu tshiprofete Masiya ne ditamba dia sedre, divua Nzambi nkayende ukuna. (Yehezekele 17:22) Bushuwa, muaku wa tshiena-Ebelu bua “sedre” udi ufuma ku muaku udi umvuija “kuikala mushindame.” Bia muomumue lelu’eu, balondi ba Masiya, Yezu Kristo, badi ne bua ‘kuikala bashindame mu ditaba, bakole bobobo,’ bu mutshi mule ne mukolakane wa sedre. (1 Bena Korente 16:13, MMM) Mmunyi mutudi mua kukumbaja bualu ebu? Pa kukandamena ne dishindama dionso buenzeji budi kabuyi bua Buena-Kristo ne kutungunuka ne kunanukila bikole mu njila wa muoyo-mutoke ne wa bulamate kudi Nzambi. Aba badi benza nunku badi babumvuija mu Bible bu ‘muntu muakane udi utumpuka bu mutshi wa sedre wa ku Lebanone.’​—Misambo 92:13, MMM.