Tshidiila tshikese tshia kule
MIFIDI mileji ngikadilu itubu batamba kuenza nayi mudimu bua kumvuija tshidiila tshia Sainte-Hélène ng’eyi: “tshia kule” ne “tshikese.” Mbiakanyine bualu tshidiila etshi, tshia kilometre 17 mu bule ne kilometre 10 mu butshiame, tshidi mutantshi wa kilometre 1 950 ne buloba bûme budi pabuipi natshi menemene, muelelu wa ku Sud-Ouest kua Afrike. Mu tshidiila etshi ke muvuabu batume Napoléon Bonaparte mu 1815 bua kujikijilamu bidimu biende bia ndekelu bu muntu mutshimuna ne muipata mu ditunga diende.
Paudi pa mbuu udi umona tshidiila etshi bu lumbu lua dikema. Bushuwa mmukuna udi kauyi kabidi uluka mudilu mutumbuke bikole ne mupatukile mu mbuu wa Atlantike, muikale ne nsongo mitumbuke ya bule bua metre 500 too ne ku 700. Pankatshi patshi, Mukuna wa Actaéon, wa metre 818, mmudie muaba munene mu tshidiila tshijima. Bua lupepe lutalale ludi lufumina ku Sud kua Atlantike ne bua muenji wa mâyi a mbuu, tshidiila etshi pa tshibidilu katshitu ne munya anyi mashika bipitshidile to. Kadi kumbukila ku muelelu mubatame wa mbuu too ne munda muatshi kudi mikuna ya bungi, kudi dishilangana dinene dia luya ne mashika ne dia bukua-mitshi.
Sainte-Hélène ntshitupa tshivua ku bulombodi bua Grande-Bretagne katshia ku ndekelu kua siekele wa 17. Bantu bafumine ku Mputu, ku Asia, ne mu Afrike mbasambakenamu. Ne bonso badimu mbatue ku 5 000. Mu tshidiila tshijima badi bakula Anglais, kadi badi bayakula wabu mushindu. Kamutu tshipalu dia ndeke; tshidi tshituangaja tshidiila etshi ne matunga makuabu tshidi anu njila wa mazuwa, ne atu atambakana pa tshibidilu pankatshi patshi ne ditunga dia Afrique du Sud anyi ne dia Angleterre. Bushuwa, televizion wakabanga kulejamu bindidimbi anu munkatshi mua bidimu bia 1990, ku diambuluisha dia tshiamu tshidibu babikila ne: satelite.
Ku ntuadijilu kua bidimu bia 1930, bua musangu wa kumpala lumu luimpe lua Bukalenge bua Nzambi luakafika muaba eu munyunguluka kudi mâyi. (Matayo 24:14) Munkatshi mua bidimu bia bungi, bena mu tshidiila etshi ba bungi mbapete tshintu tshia mushinga tshidi tshivuija bubanji bua ku mubidi kabuyi ne mushinga. (Matayo 6:19, 20) Lelu’eu, Sainte-Hélène udi ne diakalenga dia kuikala ne Ntemu 1 bua bantu 31, bungi butambe bua mu matunga onso pa buloba bujima!
[Tuarte mu dibeji 24]
(Bua kumona malu bimpe, tangila mu mukanda)
Sainte-Hélène
JAMESTOWN
Levelwood
AFRIKE
MBUU WA ATLANTIKE
Sainte-Hélène