Badi bapingaja dîna dia Nzambi

“DÎNA dia Yehowa divua diumbusha mu Bible mivule bidimu anyi mene siekele ya bungi, kadi bantemu bende ba tshikondo tshietu etshi ke tshitendelelu tshimuepele tshia bena Kristo tshidi tshipete dikima dia kupingaja tetragrame.”a

Mêyi adi kuulu eku ng’a mu mukanda wa Jeová dentro do Judaísmo e do Cristianismo (Yehowa mu Buena-Yuda ne Buena-Kristo), mufunda kudi Assis Brasil muena mu ditunga dia Brésil. Kadi lukonko ludi mua kujuka ne: Nansha mudi nkudimuinu mikese ya Bible yenza mudimu ne dîna dia Nzambi mu mushindu umue anyi mukuabu, bua tshinyi bitendelelu bikuabu mbidiumbushe mu Bible yabi? Brasil udi wamba ne: “Bavua pamu’apa bumbushe dîna dia Nzambi bua bitabataba . . . , ngenyi mifuikakaja, anyi dijinga dia kutumbisha dîna dia Yezu ne dia mamuende Mariya.”

Kadi, anu mudi Muena-muabu Brasil wambilamu: “Nkudimuinu wa Les Saintes Écritures Traduction du monde nouveau mu Tshimputulukeshi mmujikije muanda wonso nkong wa diumbusha dia dîna [dia Nzambi].” Mmu mushindu kayi nanku? Mmu mushindu wa se: dîna Yehowa ndipingaja pa muaba mudiakanyine mu Bible au. Dîna Yehowa didi mu Traduction du monde nouveau misangu mipite pa 7 200.

Katshia bamupatula bua musangu wa kumpala, mbabanye miliyo mipite pa isambombo ne tshitupa ya nkudimuinu eu wa ku muaku ku muaku mufunda mu Tshimputulukeshi tshia lelu. Nenku, mu difunda mu tshikandakanda kampanda tshia mu Brésil (Diário do Nordeste), kamona-kamba kakelakana bua kuebeja ne: “Uvuaku mumanye ne: Nzambi utu ne dîna anyi?” Ku diambuluisha dia nkudimuinu eu wa Bible wa lelu, bantu miliyo mivule badi mua kuandamuna ne: “Eyowa. Dîna dia Nzambi n’Yehowa.”

[Mêyi adi kuinshi]