Bakokeshi badi bela Bantemu kalumbandi

MU Ditunga dia Espagne, mu tshimenga tshia Cadix muaba utu mazuwa imanyina, mutantshi wa kilometre mitue ku 500 ku Sud-Ouest kua tshimenga tshia Madrid, Doña Teófila Martínez, mulombodi wa tshimenga atshi, wakapesha Bantemu ba Yehowa dibaya difunda miaku (dileja kuulu eku). Tudi tubalapu ne: “Nzubu wa biro bia mbulamatadi (Hôtel de ville) wa Cadix mmupeshe Bantemu ba Yehowa dibaya edi bua kuleja dianyisha bua dikuatshisha ne madikolela adibu benza bua disanka dia bena mu tshimenga etshi.” Ntshinyi tshivua Bantemu benze bua kubapabu lumu elu?

Bavua babambike lumu elu bua kuleja dianyisha bua mudimu uvuabu benze bua kulongolola tshitupa tshia tshipalu tshia ndundu tshia mu tshimenga. Munkatshi mua matuku a bungi a ku ndekelu kua lumingu, Bantemu nkama mivule bavua baya ku budisuile bua kuambuluisha mu dilongolola dia nkumba ya muinshi ya ku tshipalu tshia ndundu tshia Carranza. Mpindieu bantu bonso badi babuelamu badi basangana milonda ya mâyi ne sima uvuabu bele panshi.

Munkatshi mua tshikondo kampanda, Bantemu ba Yehowa badi mu malanda mimpe ne bena mu tshimenga tshia Cadix. Tshidimu tshionso biro bia mbulamatadi bitu bipesha Bantemu Tshipalu tshia Carranza bua mpungilu wabu wa distrike. Pa nanku, Bantemu badi ne disanka bua kuenza muabu muonso bua kulama bimpe tshipalu etshi.

Kadi, kusakidila ku mudimu mukole wa bianza utu ukengedibua, Bantemu ba Yehowa batu bakumbula pa tshibidilu bantu ba mu tshimenga atshi badibu nabu pabuipi bua kubambuluisha mu mushindu mukuabu. Badi bamanyisha “lumu luimpe” lua Bukalenge bua Nzambi. Bushuwa, kabatu benza mudimu wabu wa patoke bua bantu babele kalumbandi to. Badi bawenza mu ditumikila dîyi dia Yezu dia kuyisha “lumu luimpe lua bukalenge” ne “kuenza bantu ba bisamba bionso bayidi.” (Matayo 24:14; 28:19, NW) Mu dienza nenku, Bantemu ba Yehowa badi bambuluisha tshinsanga tshiabu pa kulongesha bantu ‘njila wa buakane.’​—Nsumuinu 12:28.