Dinanga bua ‘bena dîku dia bena kuitabuja’

BENA KRISTO balelela mbasuikakane munkatshi muabu bu bena dîku. Bushuwa, katshia mu siekele wa kumpala B.B., badi babikilangana ne: ‘muanetu wa balume’ ne ‘muanetu wa bakaji.’ (Mâko 3:31-35; Filemona 1, 2) Aa ki mmêyi a patupu to; adi aleja mushindu udi batendeledi ba Nzambi bangatangana. (Tangila 1 Yone 4:7, 8.) Yezu wakamba ne: ‘Bua bualu ebu bantu bonso nebamanye ne: nudi bayidi banyi, binuasuangana nunku.’​—Yone 13:35.

Dinanga edi diakamueneka patoke mu Kashipu 1997 pavua munanga wa mutantshi mule mulonda kudi mvula ya bungi ne dipasalala dia mâyi bienzeke mu ditunga dia Chili. Diakamue, bantu ba bungi bavua dijinga ne biakudia, bilamba ne bintu bikuabu. Mu nsombelu eu wa dikenga, Bantemu ba Yehowa batu badienzeja bua kulonda mubelu wa Paulo mupesha bena Galatia ne: ‘Nunku patudi bamanye mua kuenza, tuenzelayi bantu bonso bimpe, kadi tutambe kuenzela bena dîku dia bena kuitabuja bimpe.’​—Galatia 6:10.

Nenku, Bantemu ba Yehowa bakadilongolola pa lukasa bua kufila diambuluisha. Bakasangisha biakudia, bilamba ne bintu bikuabu, bakabilonga bimpe, kubisuika mu mabuki ne pashishe kubituma muaba uvua tshipupu tshienzekele. Nansha bana bakafila bintu bia kunaya nabi! Muanetu wa bakaji kampanda wakakema bikole pakamonaye Nzubu wa Bukalenge mûle ne bintu bia kuambuluisha nabi bantu. Udi wamba ne: “Ngakashala nkatshila, tshiyi mumanye ne: nseka anyi ndila. Ke bintu bituvua tukengela menemene.”

Pashishe, muanda utuvua katuyi belele meji, tshikumina tshiakenzeka tshine tshitupa atshi tshivua mâyi mapasalale. Nzubu ya bungi yakupuka. Bua kukumbaja majinga a bantu, bakenza komite ya bungi bua kufila diambuluisha. Komite mishilangane ya luibaku ya rejon, itu pa tshibidilu ibaka nzubu idi Bantemu ba Yehowa benzela bisangilu, yakaditua mu mudimu muaba eu. Kuakamueneka tshipeta kayi? Bana betu bakibaka nzubu ya bungi ya bunene buakanyine bua bavua nzubu yabu miupuke. Nansha muvua nzubu eyi kayiyi ne bintu bia bungi bia diyilengeja nabi, ivua mishilangane bikole ne ivua mibakila bantu ku mfranga mibasombesha bua kubambuluisha: kayiyi miela sima, madidishi ne kayiyi milaba mukubu.

Bamue bana betu bakenza ngendu mitantshi mile bua kuambuluisha. Mulombolodi wa Komite kampanda wa luibaku wakanyunguluka tshitupa atshi matuku abidi malondangane bua kumona bintu bivua binyanguke​—nansha muvuaye wendela mu dikalu diende dia balema. Muanetu wa balume mukuabu muikale mpofo wakenza mudimu ne tshisumi, wambula mabaya ne uya nawu kudi muena mabaya uvua uakosa bilondeshile bunene ne bule buvua bukengedibua. Munga muanetu wa balume muena mapapa uvua unguija mabaya ne uya kuafila muaba uvuabu nawu dijinga.

Bantu ba bungi bakamona bualu ebu bavua bakema bua diambuluisha difila kudi bana betu. Mu tshimenga kampanda, bampulushi bavua bimanyike mashinyi abu pabuipi ne nzubu wa muanetu wa bakaji uvuabu balongolola. Bampulushi aba bavua bajinga kumanya tshivua tshipitakana. Umue wakebeja muanetu wa balume kampanda ne: “Badi benza mudimu aba mbanganyi bualu badi bamueneka bikale ne disanka dia bungi, ne badi babafuta makuta bungi munyi?” Muanetu wa balume eu wakamumvuija ne: bonso buabu bavua benza mudimu eu ku budisuile. Mukuabu mpulushi wakumvuija ne: utu ufila tshia dikumi ngondo yonso mu tshitanda tshiabu, kadi katshia tshikumina tshienzeka kavua muanji kumona mpasata wabu mulue kumutangila to! Dituku diakalonda bakela muanetu wa bakaji eu nshinga kudi mpulushi kampanda. Yeye pende uvua mumone benji ba mudimu abu. Wakamba ne: musangelu uvua nawu benji ba mudimu abu uvua mumukemeshe bikole mu mushindu wa se: uvua mumvue bimusaka kuenza pende nabu mudimu au!

Bulelela, diambuluisha difila mu Chili divua bualu bua disanka bua bena budisuile ne mushindu mulenga wa diyisha bantu ba bungi bavua bamone muanda au.