Meji a ‘kujingulula malu alua kuenzeka’
“BUALU ntshisamba tshia bantu batshimbakane, kabayi ne lungenyi. Bu bobo ne meji, bavua mua kumvua, bavua mua kujingulula malu abenzekela kumpala.”—Dutelonome 32:28, 29, MMM.
Mose ke wakambila bena Isalele mêyi aa pakavuabu pa kubuela mu Buloba Bulaya. Mose uvua udianjila kumanyisha tshikondo tshivuabu mua kulekela Yehowa ne kubenga kuela meji bua bipeta bibi bivua bienzedi biabu mua kupatula. Mu siekele mivule yakalonda, bena Isalele—kusangisha ne bakalenge ba bungi—bakalengulula malu avua Nzambi mubadimuije.
Tshilejilu, Solomo uvua mumanye mukenji wa Nzambi uvua ukandika diselangana ne bantu bavua batendelela nzambi mikuabu, kabayi batendelela Yehowa. (Dutelonome 7:1-4) Nansha nanku, wakasela “bakaji ba bisamba bikuabo.” Ntshipeta kayi tshivuaku? Bible udi wamba ne: ‘Pavua Solomo mumane kukulakaja, bakaji bende kumusaka bua atendelele [“nzambi,” NW] mikuabu. Muoyo wende mujima kautshivua kudi [“Yehowa Nzambi,” NW] wende bu muvua wa tatuende Davide.’ (1 Bakelenge 11:1, 4, MMM) Nansha muvuaye muntu wa meji, Solomo wakapangila lungenyi bua ‘kujingulula tshivua mua kumuenzekela’ bu yeye mua kutupa ku mukenji wa Nzambi.
Netuambe tshinyi buetu tuetu? Tudi mua kuepuka ntatu ya bungi bu tuetu mua kudianjila kuelangana meji pa mapangadika atudi tuangata mu nsombelu. Tshilejilu, badi babela bena Kristo bua ‘kudilengeja ku manyanu onso a mubidi ne a nyuma.’ (2 Kolinto 7:1) Bualu ebu mbua meji, kadi bantu ba bungi kabena ne meji bua kujingulula tshidi mua kubenzekela bu buobu mua kupepeja mubelu eu wa kudi Paulo. Tshilejilu, bansonga ba bungi badi banyanga mibidi yabu pa kunua mfuanka, bela meji ne: kunua makanya kudi kubavuija batalamuke ne bantu bakulumpe. Bidi bibungamija padi, kunyima kua matuku, bakuabu bapia masama a mioyo, kansere anyi diuwulakana dia bisulusulu bua dinua dia makanya.
Mbia mushinga bua kukonkonona ne muoyo mujima bipeta bidi mua kufumina ku mapangadika ne bienzedi bietu. Paulo wakambilamu pakafundaye ne: ‘Tshintu tshionso tshidi muntu ukuna, ntshiotshi tshiapuolaye. Muntu udi ukunyina mubidi wende bintu, neapuolele mubidi wende bintu bibole; kadi muntu udi ukunyina nyuma bintu, neapuole muoyo wa tshiendelele bua nyuma.’—Galatia 6:7, 8