Kansungasunga ka makoba ne bitendelelu

AVUABU bamuela nkonko kudi bafundi ba tshikandakanda tshia Time, Mathabane, Mufundi wa mu ditunga dia Afrique du Sud wakamba ne: “Pangakafika mu ditunga dia États-Unis mu 1978, mvua ngela meji ne: ditunga edi dikavua dijikije kale malu a ditapuluka dia makoba, ne bafiike bakavua balue bena-ditunga bu bantu bonso. Ngakamona se: bivua nanku mu malu a bungi. États-Unis uvua umueneka mushiye Afrique du Sud kunyima kule mu muanda eu. Kadi biakantonda bikole pangakajingulula ne: mitshima ya bantu kayivua mishintuluke menemene to.” Ntshinyi tshiakamufikisha ku dijingulula nsombelu eu udi ukemesha?

Mathabane wakamba ne: “Dimue dia ku mêba adi kansungasunga ka makoba kamueneka mu Amerike ndîba dia 11 wa dinda mu Dia lumingu.” Wakafika ku dimona se: too ne mu tshitanda tshia Nzambi, bantu kabavua banyisha bua kutendelela pamue ne bantu ba dikoba dikuabu to. Wakakonka ne: “Ntshinyi tshitu meji abu matuku makuabu a lumingu bua bantu ba dikoba dikuabu?” Muikale uleja dilonga mukanda bu muanda udi mua kushintulula malu, Mathabane wakamba ne: “Ku diambuluisha dia dilonga mukanda muntu udi ufika ku dianyisha bantu ba miaba yonso.”

Bantemu ba Yehowa badi bitaba ne: dilonga ke didi mua kujikija tshilumbu etshi, kadi badi nangananga babela bantu bua kulonda dilonga didi dishindamene pa Dîyi dia Nzambi. Eyowa, Bible udi ubambuluisha bua kulekela meji mabi a disungulula makoba nansha mu matunga mudi dikinangana dia bisa ditangalake. Lumingu luonso mu Nzubu yabu ya Bukalenge, bantu ba makoba ne bisamba bishilangane batu badisangisha bua kulonga mikenji ne mêyi-maludiki a mu Bible, Dîyi dia Nzambi. Kabatu balombangana mfranga mu bisangilu ebi nansha. Badi bakubikila bua ubuelemu!